Пра гэта ў сацыяльных сетках паведаміла ягоная жонка Паўліна.
Скурко затрымалі 8 ліпеня 2021 году. У сакавіку 2022-га яго прызналі вінаватым паводле ч. 2 арт. 216 Крымінальнага кодэксу «Нанясеньне маёмаснай шкоды без прыкмет раскраданьня, учыненае групай асоб» і асудзілі на 2,5 года пазбаўленьня волі ў калёніі агульнага рэжыму.
Прэтэнзія палягала ў тым, што за камунальныя паслугі для памяшканьня, дзе месьцілася рэдакцыя «Нашай Нівы», плацілі па тарыфах для фізычных асоб, а трэба было плаціць па тарыфах для юрыдычных асоб.
Сьледчыя налічылі, што за чатыры гады прадпрыемству «Мінэнэрга» была нанесена шкода больш за 10 тысяч рублёў, якую абвінавачаныя пакрылі ў поўным абʼёме. Само прадпрыемства з прэтэнзіямі ніколі не зьвярталася.
На волі Андрэя чакалі жонка Паўліна і маленькі сынок Тамаш. Для яго ён увесь час зьняволеньня пісаў дзіцячыя вершы, якія склалі аснову зборніка «Пра сланоў і барсучкоў», выдадзенага ў мінулым годзе. Таксама за кратамі Скурко пераклаў на беларускую «Доктара Айбаліта» Карнея Чукоўскага, які стаў беларускім «Доктарам Будзь-Здароў».
Справа «Нашай Нівы»
- Чатырох «нашаніўцаў» затрымалі 8 ліпеня 2021 году: галоўнага рэдактара сайту «Наша Ніва» Ягора Марціновіча, галоўную бухгальтарку «Нашай Нівы» Вольгу Раковіч, рэдактара часопіса «Наша гісторыя», дзіцячых часопісаў «Асьцярожна, дзеці!» і «Дуду» Андрэя Дынько і кіраўніка аддзелу рэклямы і маркетынгу Андрэя Скурко.
- Марціновіча пры затрыманьні білі па галаве. Яму выклікалі «хуткую».
- «Нашаніўцаў» затрымлівалі спачатку ў межах крымінальнай справы аб «арганізацыі дзеяньняў, якія груба парушаюць грамадзкі парадак (ч. 1 арт. 342 КК Беларусі).
- Паўторна іх затрымалі за тое, што камунальныя паслугі ў памяшканьні рэдакцыі яны плацілі паводле тарыфаў для фізычных асобаў, а трэба было як для юрыдычных. Пазыка склала 3500 рублёў. Марціновічу і Скурко выставілі абвінавачаньне ў нанясеньні маёмаснай шкоды без прыкметаў раскраданьня (ч. 2 арт. 216 КК). Ім пагражае «хімія» або калёнія тэрмінам да 5 гадоў.
- Раковіч і Дынько выпусьцілі цягам двух тыдняў пасьля затрыманьня. Пад вартай застаюцца Марціновіч і Скурко.
- Скурко хварэе на інсуліназалежны дыябэт. Да таго ж за кратамі ў яго дыягнаставалі пнэўманію.
- Доступ да сайту «Нашай Нівы» зьнік 8 ліпеня, 29 ліпеня сайт nashaniva.com аднавіў працу. Рэдакцыя цяпер працуе з-за мяжы.
