Кястуціс Будрыс, старшы дарадца прэзыдэнта Літвы Гітанаса Наўседы ў пытаньнях нацыянальнай бясьпекі, заявіў, што рэжым Аляксандра Лукашэнкі будзе несьці адказнасьць за любыя дзеяньні групы наймітаў «Вагнэр» у Беларусі, якія прывядуць да абвастрэньня напружанасьці ў рэгіёне.
«Такога пакуль няма, падкрэсьліваю, у Беларусі, але калі гэта адбудзецца, мы абавязкова будзем гатовыя. І адразу фіксую пасыл — мы непазьбежна, будзе гэта падкантрольна ці не, зь ведама некага ці не, мы будзем наўпрост зьвязваць з рэжымам у Беларусі любыя дзеяньні, бо яны далі або зьбіраюцца даць прытулак такому злачынцу і элемэнтам ваенных злачынцаў», — сказаў Кястуціс Будрыс у эфіры радыё Ziniu radijas, паведаміла выданьне lrt.lt.
Паводле яго, Літва будзе вымушана аддаваць больш увагі ахове сваёй дзяржаўнай мяжы.
«Маючы яго [Прыгожына] на мяжы, нам давядзецца аддаваць больш увагі як мяжы, так і таму, што адбываецца ў Беларусі, і паслаць вельмі дакладны сыгнал, дзе мяжа нашай цярпімасьці. Яна будзе нулявая», — дадаў дарадца літоўскага прэзыдэнта.
Кястуціс Будрыс мяркуе, што сілы Прыгожына небясьпечныя таму, што могуць дзейнічаць у «шэрай зоне» пры правядзеньні дывэрсійна-прарыўных апэрацый, што вагнэраўцы ўжо ня раз паказвалі ў Афрыцы і Сырыі.
«Зразумела, што такі некіраваны элемэнт — чыньнік рызыкі, і нам давядзецца сапраўды адаптавацца, і дакладна не рэжыму Лукашэнкі справіцца з тым, што ў яго пад бокам», — мяркуе Кястуціс Будрыс, старшы дарадца прэзыдэнта Літвы Гітанаса Наўседы ў пытаньнях нацыянальнай бясьпекі.
Прадстаўнікі літоўскіх праваахоўных органаў паведамілі, што пры павелічэньні рызыкі для бясьпекі краіны будзе абноўлены плян рэагаваньня, які прадугледжвае аўтаматычнае далучэньне службаў Міністэрства ўнутраных спраў да аховы мяжы зь Беларусьсю.
Спроба ўзброенага мяцяжу ў Расеі. Асноўнае
- Увечары 23 чэрвеня кіраўнік ПВК «Вагнэр» Яўгеній Прыгожын заявіў, што міністэрства абароны РФ нанесла ракетныя ўдары па тылавых лягерах наймітаў і што «зло, якое нясе вайсковае кіраўніцтва краіны, будзе спынена».
- Міністэрства абароны Расеі назвала гэтыя словы «інфармацыйнай правакацыяй».
- Уначы Прыгожын паведаміў, што байцы «Вагнэра» ўвайшлі ў Расею з акупаваных раёнаў Ўкраіны.
- Раніцай 24 чэрвеня Прыгожын заявіў, што ПВК «Вагнэр» увайшла ў Растоў-на-Доне і ўзяла пад кантроль вайсковыя аб’екты Растова, у тым ліку аэрадром.
- Пазьней Прыгожын заявіў і пра ўзяцьце пад кантроль вайсковых абʼектаў у Варонежы.
- У Маскоўскай, Растоўскай і Варонескай вобласьцях РФ увялі надзвычайныя захады бясьпекі.
- У Расеі завялі крымінальную справу аб узброеным мяцяжы.
- Пуцін у ранішнім звароце заявіў, што «Расею мяцяжом спрабуюць штурхаць да паразы і капітуляцыі» і што «дзеяньні супраць мяцежнікаў будуць жорсткімі».
- Кіраўнік дэпартамэнту нацыянальнай бясьпекі ў складзе Аб’яднанага пераходнага кабінэту Валер Сахашчык у сувязі з падзеямі ў Расеі заклікаў беларусаў «выкарыстаць гістарычны шанец».
- Лідэрка дэмакратычных сілаў Беларусі Ціханоўская заклікала дыпляматаў і сілавікоў не выбіраць паміж Пуціным і Прыгожыным, а вайскоўцаў — выгнаць войскі Расеі зь Беларусі.
- Аб’яднаны пераходны кабінэт заявіў, што «дэнансуе палітычныя і ваенныя дамовы з Расеяй» і аб’яўляе аб выхадзе Беларусі з АДКБ, ЭАЭС і СНД.
- Полк Каліноўскага заклікаў грамадзянаў Беларусі рыхтавацца да «вызваленьня ад дыктатуры і акупацыі»
- Прэс-служба Аляксандра Лукашэнкі ўвечары 23 чэрвеня напісала, што той угаварыў заснавальніка ПВК «Вагнэр» Яўгенія Прыгожына спыніць прасоўваньне да Масквы.
- Пазьней Прыгожын заявіў аб завяршэньні марша і вяртаньні баевікоў у палявыя лягеры.
- Пазьней зьявілася навіна аб тым, што Прыгожын паедзе ў Беларусь, а крымінальную справу ў РФ супраць яго спыняць.
- 26 чэрвеня у Генпракуратуры Расеі паведамілі, што справу супраць Прыгожына не спынілі.
- 27 чэрвеня Аляксандар Лукашэнка пацьвердзіў прылёт у Беларусь кіраўніка ПВК «Вагнэр» Яўгенія Прыгожына. Найміты ПВК «Вагнэр», паводле Лукашэнкі, будуць працаваць у Беларусі інструктарамі, ім прапанавалі ў распараджэньне закінутую вайсковую частку.
- 2 ліпеня ПВК «Вагнэр» абвясьціла, што на месяц прыпыняе вэрбоўку ў свае шэрагі. Гэта патлумачылі часовым няўдзелам групоўкі ў вайне супраць Украіны і «пераездам у Рэспубліку Беларусь».
- У сярэдзіне ліпеня байцы ПВК сталі калёнамі прыбываць у лягер каля вёскі Цэль. Міністэрства абароны Беларусі абвясьціла пра сумесныя трэнаваньні на палігоне «Берасьцейскі».
- Былы лідэр прарасейскіх сэпаратыстаў на Данбасе Ігар Стралкоў-Гіркін у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
- Агулам у Беларусь прыехалі 12 калёнаў наймітаў. Там была і будаўнічая тэхніка.
- 23 жніўня, як паведаміла Расавіяцыя, Яўгеній Прыгожын загінуў у разьбітым самалёце пад Цьверру. Разам зь ім там быў адзін з камандзіраў ПВК «Вагнэр» Дзьмітрый Уткін.
