На падкантрольнай Украіне тэрыторыі Херсонскай вобласьці пасьля падрыву Кахоўскай ГЭС 27 чалавек лічацца зьніклымі бязь вестак па стане на 12.55 10 чэрвеня, паведаміў у Фэйсбуку міністар унутраных спраў Украіны Ігар Кліменка.
На левым беразе Дняпра, падкантрольным Расеі, невядомы лёс 374 чалавек, паведамляе выданьне «Агентство» са спасылкай на валянтэраў. Каардынатарка валянтэраў распавяла, што ў базе застаюцца больш за 1700 заявак на эвакуацыю, кожная зь які, як правіла, датычыцца некалькіх чалавек.
Паводле Ігара Кліменкі, агулам у Херсонскай вобласьці падтопленыя 47 населеных пунктаў, зь якіх 33 (3815 дамоў) — на падкантрольнай Украіне тэрыторыі, 14 — на акупаванай. Ужо эвакуявалі 2 620 чалавек, зь якіх 160 дзяцей. 11 чалавек траўмаваныя ў выніку абстрэлаў падчас эвакуацыі, 4 чалавекі загінулі.
У Мікалаеўскай вобласьці падтоплены 31 населены пункт. Эвакуяваныя 936 чалавек, сярод якіх 167 дзяцей. 1 чалавек загінуў.
На Днепрапятроўшчыне адсутнічае водазабесьпячэньне ў больш як 89 тысяч абанэнтаў у 26 населеных пунктах, ім падвозяць пітную і тэхнічную ваду.
- Плаціну Кахоўскай ГЭС падарвалі ноччу 6 чэрвеня. Яе разбурэньне пацягнула за сабой затапленьне вялікіх тэрыторый ніжэй па цячэньні і абмяленьне вадасховішча вышэй. Затоплена вялікая тэрыторыя па абодвух берагах Дняпра. Зона затапленьня на падкантрольным Расеі левым беразе большая, чым на кантраляваным Украінай правым.
- Украіна абвінавачвае ў падрыве плаціны Кахоўскай ГЭС Расею і сьцьвярджае, што расейскія вайскоўцы замінавалі ГЭС раней на выпадак украінскага наступу. Украінскія прадстаўнікі падкрэсьліваюць, што плаціна праектавалася зь вялізным запасам трываласьці супраць зьнешніх узьдзеяньняў, і лічаць, што яна была падарваная знутры.
- Крэмль называе разбурэньне плаціны «наўмыснай дывэрсіяй» з боку Кіева, не ўдакладняючы пры гэтым, што менавіта магло прывесьці да яе разбурэньня.
- Яшчэ адна вэрсія — натуральнае разбурэньне плаціны з прычыны ранейшых абстрэлаў і нядобрасумленнага абслугоўваньня ГЭС Расеяй, якая кантралявала яе і, у прыватнасьці, ня зьнізіла занадта высокі ўзровень вады ў вадасховішчы.
