Пастара з Новалукомля паўторна арыштавалі на 15 сутак
Судзьдзя суда Чашніцкага раёна Ірына Кручыніна 12 траўня разгледзела адміністрацыйную справу пастара эвангельскай царквы Новалукомля Аляксандра Зарэцкага. І нібыта за распаўсюд «экстрэмісцкіх» матэрыялаў у сацсетках пакарала яго арыштам на 15 дзён.
Раней, 21 красавіка, тая ж судзьдзя арыштавала пастара на той жа тэрмін паводле ч. 2 арт. 19.11 КаАП («Распаўсюд экстрэмісцкіх матэрыялаў»).
Падчас судовага разбору судзьдзя Кручыніна выявіла, што на сваёй старонцы ў Facebook Зарэцкі разьмясьціў і захоўваў фатаздымак сябе зь дзіцем на фоне нацыянальнага беларускага сьцяга, які быў аформлены выявай лягатыпу Tut.by, а таксама публікацыю з інтэрнэт-супольнасьці Радыё Свабода.
На прапаведніка эвангельскай царквы завялі крымінальную справу
Супраць эвангельскага прапаведніка царквы «Дабравесьце» Мікалая Хіла завялі крымінальную справу, паведамляе «Хрысціянская візія». Па якім артыкуле — невядома.
Мікалая Хіла затрымалі 24 красавіка. З Акрэсьціна прапаведніка перавялі ў СІЗА ў Калядзічах, удакладняюць актывісты. Прычына затрыманьня і дэталі крымінальнай справы невядомыя.
У Менску судзяць эвангельскага верніка Віталя Прынесьліка і ягоную жонку Лізавету
У судзе Цэнтральнага раёну Менску пачаўся разгляд крымінальнай справы палітзьняволенага эвангельскага верніка Віталя Прынесьліка і ягонай жонкі Лізаветы.
Іх абвінавачваюць у групавых дзеяньнях, якія груба парушаюць грамадзкі парадак паводле ч. 1 арт. 342 КК.
Віталя затрымалі разам з жонкай у канцы лютага 2023 года. Жонку адпусьцілі пад падпіску аб нявыезьдзе, яго пакінулі пад вартай. Справу разглядае судзьдзя Вікторыя Шабуня.
Сужэнцы зьяўляюцца парафіянамі царквы «Слова жыцьця». Лізавета — вядомая інстаграм-блогерка, у яе больш за 50 тысяч падпісантаў.
У Гомлі затрымалі ня менш за пяць чалавек
Вядома, што сярод іх адна жанчына.
На «пакаяльным» відэа ўсе затрыманыя кажуць, што былі падпісаныя на «экстрэмісцкія» рэсурсы, піша «Вясна».
