Урад Малдовы паведаміў аб увядзеньні з 25 да 27 траўня замежнай вайсковай тэхнікі і сіл на малдоўскую тэрыторыю для правядзеньня першых супольных з Францыяй, Румыніяй і Вялікай Брытаніяй вайсковых вучэньняў «Паветраны бастыён».
Згодна з паведамленьнем ураду, тэхнічныя падразьдзелы будуць рухацца праз прапускны пункт «Леўшэнь», потым у кірунку Кішынёва на вайсковую базу «Бульбаака». Калёны будзе суправаджаць паліцыя.
У траўні парлямэнт Малдовы ініцыяваў працэдуру выхаду зь Міжпарлямэнцкай асамблеі СНД.
У красавіку Эўрапейскі парлямэнт ухваліў рэзалюцыю, у якой рэкамэндаваў да канца 2023 году пачаць з Малдовай перамовы аб яе далучэньні да Эўразьвязу.
18 траўня прэзыдэнтка Малдовы Мая Санду заявіла, што сяброўства ў Эўразьвязе — найлепшы спосаб для краіны абараніцца ад патэнцыйнай расейскай агрэсіі, а яе цяперашні статус нэўтралітэту заўсёды можа быць перагледжаны.
Першага чэрвеня ў Малдове пройдзе першы саміт Эўрапейскай палітычнай супольнасьці, створанай летась прэзыдэнтам Францыі Эманюэлем Макронам для паляпшэньня супрацоўніцтва паміж Эўразьвязам і краінамі, якія не ўваходзяць у яго склад.
