У дакумэнце заяўляецца аб рашучасьці прыцягнуць да адказнасьці «расейскі рэжым, яго суагрэсараў у асобе беларускага рэжыму і ўсіх іншых вінаватых, у тым ліку за злачынствы агрэсіі, ваенныя злачынствы, злачынствы супраць чалавечнасьці і магчымыя акты генацыду, учыненыя ва Ўкраіне».
Парлямэнцкая асамблея NATO таксама выказвае занепакоенасьць «падтрымкай беларускім рэжымам агрэсіўнай вайны Расеі, у прыватнасьці выкарыстаньнем тэрыторыі Беларусі ў мэтах навучаньня і матэрыяльна-тэхнічнага забесьпячэньня».
Дэмакратычная лідэрка Беларусі Сьвятлана Ціханоўская на пасяджэньні палітычнага камітэту Парлямэнцкай асамблеі NATO прадставіла распрацаваны дэмакратычнымі сіламі плян руху Беларусі ў бок эўрапейскай пэрспэктывы.
Сёньня падчас сустрэчы з прэзыдэнтам Парлямэнцкай асамблеі NATO Жаэлем Гар’ё-Майлам Ціханоўская ўзьняла тэму прыцягненьня Аляксандра Лукашэнкі да адказнасьці за выкраданьне ўкраінскіх дзяцей з акупаваных тэрыторый.
17 сакавіка Міжнародны крымінальны суд у Гаазе выдаў ордэр на арышт Уладзіміра Пуціна і ўпаўнаважанай пры прэзыдэнце РФ у правах дзіцяці Марыі Львовай-Бяловай у сувязі з падазрэньнем у незаконнай дэпартацыі ўкраінскіх дзяцей на тэрыторыю Расеі.
Беларускія дэмакратычныя сілы дамагаюцца выдачы аналягічнага ордэру ў дачыненьні да Лукашэнкі — з-за таго, што Беларусь прымае ў сябе дзяцей з акупаваных РФ украінскіх тэрыторый.
Парлямэнцкая асамблея Рады Эўропы ў прынятай 27 красавіка рэзалюцыі заклікала міжнародную супольнасьць «падтрымаць судовы перасьлед і прыцягненьне да адказнасьці» за незаконнае перамяшчэньне ўкраінскіх дзяцей сярод іншых асобаў і Аляксандра Лукашэнку, «самаабвешчанага прэзыдэнта Беларусі».
