Пра гэта заявіла сябра камітэту бясьпекі і выведкі Вярхоўнай Рады Ўкраіны Саламія Баброўская:
«Вяртаньне грамадзян Украіны дадому, якія ідуць, напрыклад, праз тэрыторыю Рэспублікі Беларусь або якія трапляюць на тэрыторыю Беларусі. Бываюць такія выпадкі, калі даўжэйшымі коламі выяжджаюць украінцы з акупаваных украінскіх тэрыторый праз Расею, Беларусь і на Балтыйскія краіны або выкрадзеныя дзеці, старэйшыя грамадзяне апынаюцца на тэрыторыі Беларусі», — паведаміла Саламія Баброўская у эфіры «Свобода.Ранок» (праект Радыё Свабода).
Вярхоўная Рада ў 2020 годзе заявіла, што не прызнае вынікаў прэзыдэнцкіх выбараў у Беларусі.
Калі Ўкраіна ўсё ж разарве дыпляматычныя адносіны зь Беларусьсю, то пасярэднікам паміж імі павінна будзе стаць трэцяя краіна, адзначыла Баброўская. Трэцяя краіна павінна весьці перамовы і быць мадэратарам.
Кіраўніцтва Беларусі падтрымала агрэсію Расеі супраць Украіны і забясьпечыла вайсковую інфраструктуру і паветраную прастору для ўварваньня расейскай арміі і абстрэлаў мірных украінскіх гарадоў.
Аляксандар Лукашэнка 18 красавіка сустрэўся з кіраўніком акупаванай Расеяй часткі Данецкай вобласьці Ўкраіны Дзянісам Пушыліным. МЗС Украіны асудзіла гэтую сустрэчу, назваўшы гэта спробай легітымізаваць «прадстаўніка расейскай акупацыйнай адміністрацыі ў Данецку». Таксама там вырашылі выклікаць амбасадара Ўкраіны ў Беларусі Ігара Кізіма для кансультацый.
