У гады халоднай вайны Радыё Свабода давала аўдыторыі ў СССР факты савецкай гісторыі і сучаснай рэчаіснасьці, якія ўтойваліся ад грамадзкасьці і не асьвятляліся ў афіцыйных сродках масавай інфармацыі, а таксама інфармацыю аб дзейнасьці асоб і арганізацый, якія выступалі супраць камуністычных рэжымаў.
На расейскай службе радыёстанцыі выступалі многія прадстаўнікі неафіцыйнай расейскай культуры і дзеячы расейскай эміграцыі. Прынцыпаў свабоды друку рэдакцыя прытрымліваецца да гэтага часу.
Глушэньне хваляў радыёстанцыі савецкія ўлады спынілі ў 1989 годзе. У 1991 годзе пасьля правалу путчу прэзыдэнт Расеі Барыс Ельцын легалізаваў дзейнасьць Радыё Свабода ў Маскве. Штаб-кватэра мэдыякарпарацыі Радыё Свабодная Эўропа/Радыё Свабода ў 1995 годзе на запрашэньне прэзыдэнта Чэхіі Вацлава Гавела пераехала ў Прагу.
У гады знаходжаньня ва ўладзе Ўладзіміра Пуціна расейская служба адчула праблемы.
У 2017 годзе Міністэрства юстыцыі Расеі ўнесла Радыё Свабода сьпіс «замежных агентаў», вясной 2022 году пад ціскам расейскіх уладаў закрытае маскоўскае бюро. Пасьля пачатку поўнамаштабнага ваеннага ўварваньня ва Ўкраіну і ўвядзеньня ў Расеі ваеннай цэнзуры сайты расейскай службы і яе ўліковыя запісы ў многіх сацыяльных сетках заблякаваны ўладамі.
«На працягу сямі дзесяцігодзьдзяў Радыё Свабода выконвала ролю паходні, якая паказвае насельніцтву краіны шлях з інфармацыйнай цемры, — заявіў у сувязі з юбілеем расейскай службы прэзыдэнт Радыё Свабода Джэймі Флай. — У доўгай гісторыі гэтай рэдакцыі, магчыма, самымі бліскучымі сталі некалькі апошніх гадоў, калі наша карпарацыя адчула беспрэцэдэнтны ціск Крамля. І летась, нягледзячы на спробы Ўладзіміра Пуціна перашкодзіць расейцам ведаць праўду, журналісты „Свабоды“ працягвалі сваю сьмелую працу на карысьць аўдыторыі. Гэтая крытычна важная дзейнасьць будзе працягвацца».
Радыё Свабодная Эўропа/Радыё Свабода — незалежная амэрыканская мэдыякарпарацыя, якая фінансуецца за кошт гранту Кангрэса праз Агенцтва ЗША па глябальных мэдыя. Радыё Свабода працуе на 27 мовах у 23 краінах — пераважна для аўдыторый краін, дзе свабода сродкаў інфармацыі абмежаваная.
Беларуская служба радыё «Вызваленьне» пачала вяшчаньне 20 траўня 1954 году.
