У Беларусі продажы легкавых аўтамабіляў у 2022 годзе зьнізіліся на 63,2% у параўнанні з 2021-м, паведаміў 21 лютага дырэктар кампаніі «БАА-Кансалт» Дзьмітры Ярота.
«Калі ў 2019 годзе было прададзена 65 504 аўтамабіляў, то ў 2022 годзе чальцамі Беларускай аўтамабільнай асацыяцыі было прададзена ўсяго 17 234 аўтамабілі. Нават у параўнаньні з папярэднім 2021 годам, калі было прададзена 46 837 машын, рынак упаў на 63,2%»,— сказаў Ярота.
У тройку лідэраў за мінулы год увайшлі мадэлі:
- LADA Vesta (1846 прададзеных адзінак)
- Geely Coolray (1740)
- Geely Atlas Pro Geely Atlas Pro (1700)
У рэйтынгу продажаў па брэндах на верхніх радках разьмясьціліся:
- Geely (4.355 прададзеных аўта ўсіх мадэляў)
- LADA (3.782)
- Kia (1.462).
«У 2022 годзе практычна ўсе брэнды, якія доўгія гады цешылі нас, будавалі аўтацэнтры, разьвіваліся для таго, каб пасьпяваць абслужыць нашых грамадзян, „аселі“ ў продажах. Лідэры — Geely і LADA — у параўнаньні з 2021 годам зьнізілі продаж на 41% і 68% адпаведна», — сказаў Ярота.
Калі ў жніўні 2021 году рынак прапаноўваў 112 розных мадэляў легкавых аўтамабіляў, то да канца 2022-га — менш за 30. Паводле прадстаўніка галіны, за мінулы год было прададзена 55 электрамабіляў — на 28% больш, чым у 2021-м.
«Усяго за 2022 год было рэалізавана 5 337 легкавых аўтамабіляў B-клясы, што на 68% менш, чым у папярэднім годзе. С-кляса практычна „зьвялася на нуль“ — з тысячы аўтамабіляў у 2021 годзе да дзясятка ў 2022-м», — паведаміў дырэктар «БАА-Кансалт».
У D-клясе лідэры ў продажах Toyota Camry (58 адзінак), JAC7 (41) і Mazda 6 (36). Зьніжэньне продажу за год склала 59%.
«У клясе E непадзельна пануе Audi A6. 81 аўтамабіль гэтай маркі быў прададзены ў 2022 годзе. На другім месцы BMW 5 series з 25 аўта. На трэцім — Audi A7 з 7 прададзенымі аўтамабілямі. Падзеньне ў цэлым па рынку склала 46%», — падсумаваў Ярота.
17 лістапада мінулага года старшыня Беларускай аўтамабільнай асацыяцыі Сяргей Варывода зацьвердзіў, што аўтамабільны рынак краіны зь вясны сутыкнуўся з каляпсам попыту і прапановы.
