У пасьце ў тэлеграм-канале, апублікаваным у нядзелю — на фоне чарговых крытычных выказваньняў Прыгожына ў адрас Мінабароны Расеі — Кадыраў заявіў, што «ПВК Вагнера», байцы якой удзельнічаюць у вайне ва Ўкраіне, «даказала сваю эфэктыўнасьць у ваенным пляне» і назваў Прыгожына " братам" (так ён характарызуе многіх — але ня ўсіх — рэгіянальных і фэдэральных чыноўнікаў).
Кадыраў, які пазыцыянуе сябе як «пехацінец Пуціна», падчас вайны Расеі супраць Украіны ня раз дэманстраваў падтрымку Прыгожыну. Больш за тое, супрацоўнічаюць іх структуры: вядома, што адпраўленыя на вайну праз Чачню «добраахвотнікі» трапляюць у тым ліку «ПВК Вагнера».
Амэрыканскі інстытут вывучэньня вайны (ISW) нядаўна меркаваў, што Кадыраў не падтрымае Прыгожына ў яго супрацьстаяньні з міністэрствам абароны. Гэтыя высновы засноўваліся на заявах Кадырава аб «выдатных зладжаных адносінах» з Мінабароны і аб тым, што ён ніяк не ўплывае на яго кадравую палітыку.
Калі з пачатку вайны супраць Украіны Кадыраў рэгулярна даваў справаздачу аб вялікай колькасьці чачэнцаў, гатовых «устаць на абарону радзімы», то ў апошнія месяцы ён канстатуе адваротнае, але пры гэтым толькі на чачэнскай мове. Улады рэспублікі распачалі агрэсіўную мэдыякампанію супраць тых жыхароў, якія не жадаюць ісьці на вайну добраахвотнікамі, — іх сталі вінаваціць у недастатковай мужнасьці і рэлігійнасьці.
Вядома, што з Чачні на вайну ва Ўкраіну пасылаюць супрацоўнікаў сілавых ведамстваў, мабілізаваных у рамках указа жыхароў і так званых добраахвотнікаў. Пры гэтым праваабаронцы неаднаразова заяўлялі, што заклік мае прымусовы характар — салдатамі становяцца выкрадзеныя сілавікамі маладыя людзі, а таксама, напрыклад, сваякі чачэнскіх апазыцыянэраў.
- «ЧВК Вагнера» — расейскае неафіцыйнае ваеннае падразьдзяленьне, байцы якога прымалі або прымаюць удзел у баявых дзеяньнях у Сырыі, краінах Афрыкі і ва Ўкраіне. Заканадаўствам Расеі дзейнасьць прыватных ваенных кампаній забаронена. Прыгожын прызнаў, што такая арганізацыя існуе, толькі пасьля пачатку вайны ва Ўкраіне.
- Днямі Прыгожын заявіў аб крызісе ў забесьпячэньні снарадамі байцоў «ПВК Вагнера», якія ваююць пад Бахмутам, і не наўпрост абвінаваціў у гэтым Мінабароны Расеі.
- Пасьля гэтага Прыгожын наведаў у шпіталі камандзіра чачэнскага спэцназа, набліжанага Кадыраву Апці Алаўдзінава. Па словах Кадырава, Алаўдзінава раней спрабавалі атруціць, перадаўшы атручаны ліст. Па словах Прыгожына, Алаўдзінаў перадаў яго байцам некаторую колькасьць снарадаў.
-
