Першага студзеня Харватыя ўступіла ў Шэнгенскую зону, стаўшы 27-й удзельніцай аб'яднаньня, паміж краінамі якога няма памежнага кантролю. Акрамя таго, дзяржава далучылася да зоны эўра і пачала выкарыстоўваць адзіную эўрапейскую валюту замест нацыянальнай валюты куна і стала 20-й з 27 краін, якія перайшлі на эўра.
Для пераходу на эўра Заграб павінен быў выканаць шэраг эканамічных умоваў, у прыватнасьці забясьпечыць стабільны абменны курс і нізкую інфляцыю.
У рамках паэтапнага ўкараненьня эўра ў Харватыі ў першы дзень 2023 году адключана больш за палову банкаматаў. У іх загружаюць новыя банкноты. Харвацкая куна і эўра будуць раўнапраўна выкарыстоўвацца для наяўных разьлікаў толькі два тыдні.
У ліпені Харвацкі манэтны двор пачаў чаканіць манэты эўра з нацыянальнымі матывамі краіны. У лістападзе 2022 года харвацкі парлямэнт прыняў першы дзяржаўны бюджэт краіны, намінаваны ў эўра.
Уваходжаньне Харватыі ў Шэнгенскую зону таксама дасьць штуршок ключавой індустрыі турызму, на долю якога прыпадае 20% ВУП краіны.
Цяпер беларусы, у якіх ёсьць шэнгенская віза, будуць мець магчымасьць уяжджаць у Харватыю і вольна перамяшчацца ў межах Шэнгенскай зоны. Краіна таксама атрымала права выдаваць шэнгенскія візы.
