Адкрываючы канфэрэнцыю, прэзыдэнтка Эўрапейскай камісіі Урзуля фон дэр Ляен заявіла, што падтрымка аднаўленьня і рэфармаваньня Ўкраіны мае тры ключавыя моманты.
«Спачатку мы мусім забясьпечыць, каб Украіна магла адразу атрымаць тую падтрымку, якая неабходная, — ад кароткатэрміновай да доўгатэрміновай.
Па-другое, нам патрэбна правільная архітэктура і структура, каб падтрымка была шырокай і інклюзіўнай.
І па-трэцяе, паколькі Ўкраіна мае статус кандыдата на шляху да Эўрапейскага Зьвязу, мусім гэтыя намаганьні ў аднаўленьні разглядаць у рамках шляху да Эўрапейскага Зьвязу», — сказала Урзуля фон дэр Ляен.
Тэкст яе выступу апублікавалі на афіцыйным сайце Эўракамісіі.
Паводле дэр Ляен, ЭЗ дапаможа Ўкраіне забясьпечыць цяперашнюю жыцьцядзейнасьць Украіны, у тым ліку ў выкананьні сацыяльных абавязаньняў, а таксама ў аднаўленьні інфраструктуры, школ і дапамозе перасяленцам.
Усясьветны банк ацэньвае страты Ўкраіны ад вайны на ўзроўні 350 мільярдаў эўра.
«Мы павінны працаваць усе разам. І так хутка, як гэта магчыма», — заклікала прэзыдэнтка Эўракамісіі.
Канцлер Нямеччыны: Украіне патрэбны сучасны плян Маршала
Канцлер Нямеччыны Оляф Шольц заклікаў міжнародную супольнасьць аказаць Украіне маштабную дапамогу для аднаўленьня пасьля вайны.
«Задача гэтай канфэрэнцыі — стварыць плян Маршала XXI стагодзьдзя. Прыхільнасьць Украіне як сябру Эўразьвязу зьяўляецца адным з самых пасьлядоўных геапалітычных рашэньняў нашага часу», — цытуе Deutsche Welle (DW) словы Оляфа Шольца на канфэрэнцыі.
Канцлер Нямеччыны назваў разбуральныя бамбаваньні Расеяй Украіны актам адчаю Расеі, але адзначыў, што гісторыя самой Нямеччыны засьведчыла магчымасьць аднаўленьня нават пасьля спусташальнай вайны.
«Важна плянаваць будучыню Ўкраіны як квітнеючага і дэмакратычнага сябра ЭЗ, экспартэра зялёнай энэргіі і высокатэхналягічнай прадукцыі», — перакананы ён.
Украіна заклікала распрацаваць фінансавы «Рамштайн» для дапамогі
Прэзыдэнт Украіны Ўладзімір Зяленскі заклікаў Эўразьвяз стварыць фінансавы «Рамштайн» для дапамогі краіне ў пасьляваенным аднаўленьні краіны.
Цяпер міжнародная супольнасьць стварыла фармат «Рамштайн» у вайсковай дапамозе — тэхнікай і ўзбраеньнем. Назву плян атрымаў па месцы правядзеньня першай сустрэчы міжнароднай кааліцыі, якая адбылася на авіябазе «Рамштайн» у Нямеччыне.
«Я веру, што пакуль можам ухваліць рашэньне аб пачатку фінансавага „Рамштайну“ для падтрыманьня нашай супольнай стабільнасьці. Нам патрэбна фінансава-каардынацыйная плятформа, якая аб’яднае ўсе намаганьні ў аднаўленьні нашай краіны», — сказаў Уладзімір Зяленскі, выступаючы перад удзельнікамі канфэрэнцыі па відэасувязі.
Паводле яго, украінскі ўрад распрацаваў празрысты плян аднаўленьня.
«Гэта тое, што патрэбна Ўкраіне для выжываньня. Менавіта цяпер. Вага нашага пляну хуткага аднаўленьня — 17 мільярдаў даляраў тэрмінова. Гэта лякарні, школы, жыцьцёва важная транспартная і энэргетычная інфраструктура. Мы маем калясальныя патрэбнасьці ў аднаўленьні жытла», — заявіў Уладзімір Зяленскі, і дадаў, што пакуль Украіна не атрымала «ні цэнту на хуткае аднаўленьне».
Уладзімір Зяленскі лічыць, што міжнародная супольнасьць мусіць разглядаць удзел у падтрымцы Ўкраіны з пункту гледжаньня бясьпекі.
«Нам патрэбна бясьпека на зямлі. Мы працуем над ёй разам. Нам патрэбна бясьпека ў небе. Мы працуем над ёй, дамаўляючыся аб пастаўках сыстэм супрацьпаветранай абароны. Нам патрэбна фінансавая бясьпека. І наша інстытуцыйная здольнасьць», — заявіў прэзыдэнт Украіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
