«Ахмат, Элі і Адам прабраліся ўшчыльную да пазыцый суперніка і забясьпечылі агнявое прыкрыцьцё надыходзячым байцам. Таксама, карыстаючыся выпадкам, яны зьвярнуліся да чачэнамоўных шайтанаў з прапановай выйсьці на перадавую і даказаць сваю прыхільнасьць да эўрапейскіх каштоўнасьцяў у баі», — напісаў Рамзан Кадыраў.
Ён таксама апублікаваў відэа, на якім, як сьцьвярджаецца, яго сыны Ахмат, Элі (Зелімхан) і Адам зьнятыя на фронце — на «лініі судотыку, дзе на гэты момант ідуць лютыя баі з украінскімі нацыяналістамі». На відэа юнакі ў вайсковай форме, седзячы ў акопе ў кустах, страляюць па цэлях. Дзе зьнята гэта відэа — невядома. На працягу трох хвілін ідзе страляніна, за кадрам гавораць па-чачэнску.
Відавочна, допіс Кадырава зьвернуты да Батальёна Шэйха Мансура і ўсіх чачэнцаў, якія ваююць на баку Ўкраіны. Зь іх боку неаднаразова гаварылася аб тым, што яны лічаць Кадырава кіраўніком акупацыйнай адміністрацыі Ічкерыі, цалкам залежным ад Пуціна і Масквы. Так званыя «атрады Кадырава» байцы чачэнскага супраціву называюць «TikTok-байцамі». Чачэнскія ваяры заяўлялі аб сваім намеры пасьля ўкраінскай вайны і перамогі над «кадыраўцамі» адправіцца на радзіму і «вызваліць Ічкерыю ад расейскай акупацыі». Многія зь іх маюць досьвед войнаў за незалежнасьць Чачэніі ў 90-я гады.
Рамзана Кадырава і ягоных падначаленых неаднаразова лавілі на хлусьлівай інфармацыі падчас вайны. Напрыклад, адзін са здымкаў ягоных байцоў быў падпісаны як зроблены ва Ўкраіне, а насамрэч — у беларускім Мазыры. Кіраўнік ураду Ічкерыі ў выгнаньні Ахмед Закаеў пракамэнтаваў відэа з Грознага зь некалькімі тысячамі «добраахвотнікаў», як іх назваў Кадыраў. На думку Закаева і шэрагу чачэнскіх апазыцыйных блогераў, на відэа былі й выпадковыя людзі, бюджэтнікі, апранутыя «дзеля карцінкі» ў васковую форму.
Таксама Кадыраў з паплечнікамі здымаў на пачатку вайны відэа нібыта з пазыцый, блізкіх да Кіева, абяцаючы хутка ўзяць украінскую сталіцу. Аднак не знайшлося ніякіх пацьверджаньняў рэальнага знаходжаньня Кадырава блізка да лініі фронту.
Нават калі апошняе відэа Кадырава праўдзівае і сапраўды яго сыны ўдзельнічаюць у вайне, гэта наўпрост парушае афіцыйныя расейскія законы і Канвэнцыю ААН па правах дзіцяці. Па-першае, у такім выпадку яны ў непаўналетнім узросьце карыстаюцца зброяй, а па-другое, паводле Канвэнцыі ўдзел у вайне дзяцей, маладзейшых за 15 гадоў лічыцца грубым парушэньнем іх правоў.
Ва Ўкраіне на Рамзана Кадырава завялі крымінальную справу за ўдзел у арганізацыі ваеннага ўварваньня Расеі на яе тэрыторыю.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
