«Сапраўды, згодна з загадам начальніка Валынскай вайсковай адміністрацыі ад 6 сакавіка (і потым яшчэ ад 10 сакавіка ў яго былі ўнесены зьмены), у зоне дзейнасьці Валынскай мытні канфіскавалі для патрэб Узброеных сіл Украіны 26 транспартных сродкаў, зь іх 3 — рэгістрацыі Расейскай Фэдэрацыі і 23 — беларускай рэгістрацыі», — паведаміла Свабодзе прэсавая сакратарка Валынскай мытні Валянціна Чарныш.
Паводле яе, усе гэтыя транспартныя сродкі «ўвайшлі на мытную тэрыторыю Ўкраіны да пачатку ваенных дзеяньняў».
«Нехта заехаў 22-га, а нехта 23 лютага, і цяпер гэтыя транспартныя сродкі, і тавар, якія яны перамяшчалі, канфіскаваныя на карысьць Украіны, згодна з умовамі ваеннага становішча», — удакладніла яна.
Валянціна Чарныш падкрэсьліла, што вядзецца выключна пра канфіскацыю грузавых аўтамабіляў, якія належаць юрыдычным асобам, а не легкавых, што знаходзяцца ва ўласнасьці фізычных асобаў.
«Размова ідзе выключна пра аўтадарожныя грузавыя аўтамабілі. Яны перавозілі і арматуру, і шкляныя вырабы. Адным словам, хто чым гандляваў, тое і перавозілі. Тавар перамяшчаўся яшчэ да вайны ў рэжыме транзыту або імпарту ва Ўкраіну і знаходзіўся ў зоне мытнага кантролю», — дадала прэсавая сакратарка Валынскай мытні.
У той жа час яна не змагла ўдакладніць назвы кампаній, якім належаць канфіскаваныя грузавікі, а таксама паходжаньне прадукцыі, што перавозілася.
«Мы маем транспартныя сродкі і іхныя рэгістрацыйныя нумары. Увесь тавар, які пакуль знаходзіцца ў транспартных сродках, належыць адпраўнікам — або Расеі, або Беларусі, — якія хацелі яго прадаць, але не прадалі», — адзначыла Валянціна Чарныш.
Канфіскат ідзе для ваенных патрэб
У Дзяржаўнай мытнай службы Ўкраіны паведамілі, што за 14 дзён расейскай вайны Узброеным сілам Украіны перадалі канфіскаваныя на мяжы тавары і аўтамабілі на суму 115 мільёнаў грыўняў.
У тым ліку, 650 аўтамабіляў на 105 мільёнаў грыўняў, амаль 1 мільён пачкаў цыгарэт на 5 мільёнаў грыўняў, 5,5 тысяч лекаў на 2 мільёны грыўняў, розныя прадукты харчаваньня на 1,2 мільёна грыўняў, 71 кампутар і тэлефон на 0,6 мільёна грыўняў, 1,5 тысячы бронекамізэлек, ахоўных касак і боепрыпасаў на 0,5 мільёна грыўняў.
Як патлумачылі ў Дзяржаўнай мытнай службе Ўкраіны, гэта зроблена адпаведна распараджэньню ўраду Ўкраіны ад 26 лютага 2022 году № 186-р «Аб перадачы маёмасьці для патрэб Узброеных сіл», а таксама рашэньням ваеннага камандаваньня аб прымусовым адчужэньні або канфіскацыі маёмасьці, згодна з законам «Аб прававым рэжыме ваеннага становішча».
Ва Ўкраіне 24 лютага пасьля пачатку агрэсіі Расеі абвясьцілі ваеннае становішча
Згодна з украінскім заканадаўствам, на час дзеяньня ваеннага становішча могуць абмяжоўвацца канстытуцыйныя правы і свабоды грамадзян, прадугледжаныя 12 артыкуламі Канстытуцыі Ўкраіны:
- на недатыкальнасьць жытла;
- на тайну ліставаньня, тэлефонных размоў, тэлеграфнай і іншай карэспандэнцыі;
- на неўмяшаньне ў асабістае і сямейнае жыцьцё;
- на свабоду перамяшчэньня, выбар месца пражываньня, выезд з Украіны;
- на свабоду думкі і слова, вольнае выказваньне сваіх поглядаў і перакананьняў;
- на ўдзел у кіраваньні дзяржаўнымі справамі, у рэфэрэндумах і выбарах;
- на мірныя сходы, мітынгі і дэманстрацыі;
- на сваю ўласнасьць і вынікі сваёй інтэлектуальнай і творчай дзейнасьці;
- на прадпрымальніцкую дзейнасьць;
- на свабоду выбару працы;
- на страйкі для абароны эканамічных і сацыяльных інтарэсаў;
- на адукацыю.
Пакуль што гэта адзіны выпадак канфіскацыі беларускіх грузавікоў на мяжы Ўкраіны з краінамі Эўропы. На Львоўскай мытні Свабодзе паведамілі, што такіх выпадкаў пакуль не зарэгістравалі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
