Выданьне Zerkalo.io сабрала інфармацыю аб тым, чым займаўся Аляксандар Лукашэнка з пачатку нападу Расеі на Ўкраіну.
24 лютага, 10.30-12.30: Ва Ўкраіне першыя палеглыя. Лукашэнка рыхтуецца да трэніроўкі
У Палацы незалежнасьці ў Менску Аляксандар Лукашэнка пачынае нараду з вайскоўцамі. У працэсе ён заяўляе, што сам «асабіста прапанаваў Пуціну пакінуць некаторую колькасьць Узброеных Сіл Расеі на поўдні нашай Беларусі».
Пасьля 12 гадзінаў дня ён мае зносіны з работнікамі дзяржаўных мэдыя. Акрамя іншага, гучыць пытаньне прадстаўніка тэлеканалу АНТ Ігара Тура пра пляны Лукашэнкі на наступныя дні. «Сёньня і заўтра хакей па раскладзе?» — пытаецца ён.
«Абавязкова. Трэніроўка сёньня. Усё па раскладзе. У суботу я хачу паглядзець рэзэрву. Правалілі Алімпіяду — хачу паглядзець, каго трэнэры пакажуць, рэзэрву нашу бліжэйшую. Хто ў Італіі будзе па горах поўзаць (на Гульнях 2026 году ў Міляне). Гэта ж ганьба — грошы трацім, а выніку жаданага няма», — адказаў Лукашэнка.
У гэты ж час Расея атакуе аб’екты ў дзясятках пунктаў Украіны. Дзяржаўная памежная служба Ўкраіны паведаміла пра наступ расейскіх войскаў, абстрэлы памежных падразьдзяленьняў і нарадаў, у тым ліку з тэрыторыі Беларусі. На той момант ужо ёсьць загінулыя. Ракетныя ўдары наносяцца ня толькі па вайсковых аб’ектах, але і трапляюць у населеныя пункты.
Расея напала на Ўкраіну. Першыя фатаздымкі
Расейскае кіраўніцтва называе гэта «спэцыяльнай ваеннай апэрацыяй», Кіеў і ўвесь астатні сьвет — вайной супраць Украіны.
25 лютага, 10:00: У Кіеве хаваюцца ад бомбаў. Лукашэнка на экскурсіі ў мэдыцынскім цэнтры
Лукашэнка прыехаў у Менскі навукова-практычны цэнтар хірургіі, трансплянталёгіі і гематалёгіі. Топ-чыноўнікі, уключаючы работнікаў мэдыцынскай сфэры, падчас экскурсіі па МНПЦ расказвалі палітыку аб дасягненьнях беларускай трансплянталёгіі.
Расейскія вайскоўцы захапілі два аўтамабілі Ўзброеных сіл Украіны і рушылі разам з калёнай расейскай тэхнікі ў цэнтар Кіева. У сталіцы ідуць баі. Вайскоўцы краіны адбілі атаку расейскай бранятанкавай групы ў раёне пасёлка Трохізбенка ў Новаайдарскім раёне.
25 лютага, каля 17 гадзін: Ва Ўкраіне абстралялі дзіцячы садок. Лукашэнка раздае ўзнагароды
Украінскі дэпутат паведамляе, што расейскія вайскоўцы абстралялі дзіцячы садок у Ахтырцы. Тры чалавекі загінулі, 17 дзяцей былі параненыя, зь іх трое — у цяжкім стане.
Узброеныя сілы Ўкраіны паведамляюць аб зьнішчэньні расейскай танкавай калёны, якая рухалася з боку Паўлапаля. Усяго нашы паўднёвыя суседзі паведамляюць 2800 забітых расейскіх вайскоўцаў.
Вайна і разбурэньні ва Ўкраіне. ФОТАГАЛЕРЭЯ
Лукашэнка раздае дзяржаўныя ўзнагароды спартовым трэнэрам, службоўцам, работнікам сфэры адукацыі.
26 лютага: Лукашэнка паглядзіць на спартоўцаў. Украіна працягне абараняцца ад ваенных нападаў Расеі
Вядома, што сёньня Аляксандар Лукашэнка наведае цэнтар алімпійскай падрыхтоўкі ў Раўбічах, дзе пройдзе «вялікае спартовае сьвята». Там ён у кампаніі спартоўцаў выпрабуе лыжню і стрэльбішча. «Затым на старт выйдзе моладзь», — паведамляе агенцтва «Минск-Новости».
Чым скончыцца гэты дзень для жыхароў Украіны, ня ведае ніхто. З раніцы Расея наносіць ракетныя ўдары па населеных пунктах недалёка ад украінскай сталіцы. Ідуць баі на вуліцах Кіева. Да гэтага моманту ня менш за 100 тысяч украінцаў пакінулі свае дамы, паведамляе Генэральны сакратар ААН.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
