Да сярэдзіны мінулага тыдня пастаўшчык перадаў ЭЗ 23 мільёны дозаў амэрыканска-нямецкай вакцыны супраць COVID-19. Вытворца адмовіўся камэнтаваць інфармацыю пра затрымкі, спасылаючыся на прыватнасьць графіку паставак.
Вытворца абавязаўся пастаўляць Эўразьвязу па 3,5 мільёна дозаў штотыдзень, пачынаючы ад студзеня. У мінулым месяцы здарыўся часовы збой. Як паведамлялася, ён быў зьвязаны зь перабудовай вытворчасьці, каб яе потым паскорыць.
Тым ня менш дозы, якіх цяпер не хапае, адносяцца да самай першай — сьнежаньскай — партыі: з 12,5 мільёна дозаў, заплянаваных да пастаўкі ў сьнежні летась, ЭЗ атрымаў толькі 2 мільёны. Неназваная афіцыйная крыніца паведаміла агенцтву, што кампанія паабяцала папоўніць нястачу да канца сакавіка.
Цяпер Эўразьвяз мае два кантракты з Pfizer на пастаўку 600 мільёнаў дозаў вакцыны.
Адным з сусьветных лідэраў паводле хуткасьці вакцынацыі насельніцтва застаецца Ізраіль: там першую дозу атрымалі ўжо больш за 75 працэнтаў насельніцтва. У ААЭ гэты паказьнік склаў 50 працэнтаў, у Брытаніі — вышэй за 20 працэнтаў, тым часам як у краінах Эўразьвязу — у сярэднім 5 працэнтаў. У першую чаргу іньекцыі атрымліваюць найбольш неабароненыя пласты насельніцтва — мэдыкі, настаўнікі і асобы старэйшага веку.
