7 студзеня адзначаецца Раство Хрыстова паводле Юліянскага календара. У гэты дзень пачыналі хадзіць пераапранутыя калядоўнікі. Яны сьпявалі песьні, а гаспадары павінны былі запрасіць іх у хату і пачаставаць.
Дзень у гісторыі
1610 — Галілеа Галілей упершыню паведаміў пра адкрыцьцё чатырох найбуйнейшых спадарожнікаў Юпітэра.
1929 — у Менску пачалася ІІ Усебеларуская краязнаўчая канфэрэнцыя.
У гэты дзень нарадзіліся
1897 — Язэп Адамовіч, старшыня Савету народных камісараў БССР. У часы ягонага кіраваньня (1924–1927 гг.) праводзілася дзяржаўная палітыка беларусізацыі. У часы сталінскіх рэпрэсіяў Адамовіч скончыў жыцьцё самагубствам (1937 г.).
- «Нацыянал-камуніст Адамовіч займаў у БССР пасаду старшыні Савету народных камісараў. У 1924 годзе пад ягоным кіраўніцтвам адбылося вяртаньне ў склад нашай рэспублікі беларускіх Віцебшчыны й Магілеўшчыны, адрэзаных Масквой амаль адразу пасьля абвяшчэньня БССР. У 1926-м удалося дабіцца перадачы з РСФСР у склад Беларусі Гомелю з Рэчыцай і яшчэ сямі паветаў. У выніку тэрыторыя рэспублікі павялічылася з 52 да 126 тысяч квадратных кілямэтраў, або амаль у два з паловаю разы, а насельніцтва — з 1,5 да 5 мільёнаў чалавек. Вярнуць беларускую Смаленшчыну разам зь іншымі нашымі землямі, захопленымі Расеяй, ужо не пасьпелі». Уладзімер Арлоў, «Імёны Свабоды», 4-е выданьне, с. 146-147.
1907 — опэрная сьпявачка Соф’я Друкер, народная артыстка Беларусі.
1910 — Канстанцін Заслонаў, адзін з арганізатараў савецкага партызанскага руху на тэрыторыі Беларусі.
1963 — Мікалай Аўтуховіч, грамадзкі дзяяч, палітычны вязень.
У памяці
1943 — памёр славуты сэрбскі інжынэр і вынаходнік у галіне электратэхнікі і радыётэхнікі Нікола Тэсла.
1964 — памёр беларускі паэт Янка Журба.
- «Гэта ён некалі пераканаў пісаць па-беларуску будучага аўтара „Міколкі-паравоза“ Міхася Лынькова, што на схіле дзён ён страціў зрок і жыў у невядомасьці ў доме для састарэлых» — піша пра Янку Журбу Ўладзімер Арлоў у кнізе «Імёны Свабоды», якая чацьвертым выданьнем выйшла ў «Бібліятэцы Свабоды».
1991 — памёр беларускі сатырык і драматург Кандрат Крапіва.
