Эканамічны суд Віцебскай вобласьці прызнаў банкрутам Гарадоцкае раённае спажывецкае таварыства і пастанавіў яго ліквідаваць цягам году, паведамляе БелТА.
- Таварыства віннае больш як 2,4 мільёна рублёў.
- Кошт маёмасьці ацэньваецца ў 5 мільёнаў рублёў, але большая частка нізкаліквідная.
Гэта ўжо дзясятае райпо-банкрут у Віцебскай вобласьці.
Рэшту спажывецкіх таваырстваў у Віцебскай вобласьці плянуюць рэарганізаваць, каб засталіся філіі ў Бешанковічах, Верхнядзьвінску, Вушчах, Докшыцах, Лепелі, Паставах і Сяньне.
Белкаапсаюз: найбуйнейшая гандлёвая сетка перажывае крызіс
Сетка Белкаапсаюзу складаецца з абласных і раённых спажывецкіх таварыстваў («райпо»). Гэтую структуру называюць найбуйнейшым дзяржаўным рытэйлерам.
- Цяпер спажывецкая каапэрацыя перажывае крызіс: крамы і сталоўкі зачыняюцца, кіраўніцтва арганізацыі страсаюць карупцыйныя скандалы.
- Структуры Белкаапсаюзу займаюцца нарыхтоўкай і продажам сельгаспрадукцыі, разьвядзеньнем зьвяроў, скупляюць у насельніцтва ягады, грыбы, мёд, расьлінную сыравіну ды іншыя харчы.
- Кампанія мае ўласныя транспартныя і будаўнічыя падразьдзяленьні, навучальныя ўстановы, штат налічвае больш за 86 тысяч чалавек.
- Белкаапсаюз мае 8,1 тысячы крамаў, сярод іх 6,9 тысячы — харчовых і зьмяшанага асартымэнту. Амаль 70% іх — у сельскай мясцовасьці.
- 704 «аўталаўкі» дастаўляюць тавары жыхарам больш як 14,4 тысячы маланаселеных вёсак, дзе няма стацыянарных крамаў.
- Цяпер «Белкаапсаюзам» кіруе Валеры Іваноў. Яго папярэднік Сяргей Сідзько і першы намесьнік Дзьмітры Баранаў адбываюць пакараньне за хабары і злоўжываньне ўладай.
