Маскоўскае выданьне «Коммерсант» са спасылкай на крыніцы ў расейскіх дзяржструктурах сьцьвярджае, што Беларусь накіравала ў Расею афіцыйныя запыты з просьбай дапамагчы ахоўнымі маскамі, тэст-сыстэмамі, апаратамі штучнай вэнтыляцыі лёгкіх.
Падобныя запыты, кажуць інфармаваныя асобы, па дыпляматычных каналах даслалі практычна ўсе краіны СНД, за выключэньнем Украіны і Туркмэністану.
Пры гэтым у Маскве нагадваюць, што для выдзяленьня дапамогі неабходны спэцыяльны дазвол расейскага ўраду, бо 2 сакавіка была прынята пастанова, якая забараняе вываз з краіны мэдыцынскай прадукцыі.
Камэнтуючы сытуацыю ў Беларусі, суразмоўца «Коммерсанта» выказаў надзею на тое, што там пачнуць «больш адказна» падыходзіць да барацьбы з распаўсюдам COVID-19.
«Мы ад іх абараняемся. Але задачу гэтую трэба вырашаць сумесна, паколькі калі ў адной краіне эпідэмія пойдзе на спад, а ў другой паўстане яе асяродак, то пагроза захаваецца», — адзначыў ён.
Аляксандар Лукашэнка вядзе палеміку з каранавірусам, але на ўсялякі выпадак просіць Расею аб дапамозе, непрыхавана іранізуе выданьне.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
