У бацькоўскіх чатах працягвае распаўсюджвацца інфармацыя пра пацьверджаны каранавірус у аднаго з школьнікаў.
Раніцай вакол менскай СШ №212 у мікрараёне Сухарава амаль цішыня. Звычайна ў гэты час дзеці сьпяшаюцца ў школу на заняткі, але сёньня сюды падцягваюцца ў асноўным дарослыя ды рэдкія старшаклясьнікі. Амаль у кожнага ў руках белы аркуш — гэта заява аб вызваленьні дзіцяці ад заняткаў да 27 сакавіка.
«Я толькі вярнуўся з Армэніі, там ва ўсіх школах абвясьцілі карантын»
Пра тое, чаму давялося пісаць падобную заяву, Свабодзе расказаў дальнабойнік Максім, які жыве побач.
«Вечарам у чаце напісалі са школы, што ўсім трэба падаць заяву, што гэта мы самі ня хочам весьці дзяцей у школу. Вось аднёс такую заяву пра сына, каб засьцерагчыся», — кажа Максім.
Малады бацька сьцьвярджае, што ініцыятыва зыходзіла менавіта ад адміністрацыі школы, але прычыны не паведамілі. Але Максім кажа, што яе ўсе ведаюць.
«Учора ў вучня адной клясы нібыта знайшлі каранавірус, вось і вырашылі спыніць заняткі. Але пра карантын не гавораць. Я вось толькі вярнуўся з Армэніі, там ва ўсіх школах абвясьцілі афіцыйны карантын. А ў нас зноў толькі паўмеры. Атрымліваецца, у нашай школе заняткаў ня будзе, але ў іншых будуць, пакуль і там не захварэюць?» — абураецца Максім.
Дзьмітры таксама аднёс заяву пра тое, што сын-другаклясьнік да вакацый на заняткі хадзіць ня будзе.
«Нічога не гавораць. Але гэта сур’ёзна, калі сказалі пісаць заявы. Бацькі напалоханыя. Усясьветная арганізацыя здароўя за тое, каб абвяшчалі карантын, вось і нам трэба», — мяркуе Дзьмітры.
Сяргей прыйшоў прынёс заяву ў школу з сынам.
«Са школы самі пазванілі», — кажа ён. Але ўся інфармацыя ў бацькоў на ўзроўні чутак. Нібыта дзіця, у якога выявілі каранавірус, мела кантакт са сваяком, які пабываў у Італіі.
«Калі я ўчора забірала дзіця з групы падоўжанага дня, дык казалі, што ўсіх дзяцей з той клясы, так званы другі ўзровень кантакту, забралі на аналізы, — кажа маці аднаго са школьнікаў Маргарыта. — А іхнай настаўніцы загадалі маўчаць, пагражалі нават звальненьнем, калі адмовіцца. У яе таксама бяруць аналізы, яе ізалявалі. Прабачце, больш нічога казаць ня буду, бо баюся за настаўніцу».
«Мы ідзём насустрач тым бацькам, якія пажадалі пакінуць дзяцей дома»
Паводле супрацоўнікаў школы, у будынку другі дзень вядзецца санітарная апрацоўка.
«Усё драяць, уключна з туалетамі, — паведаміла адна з настаўніц. — Пачалі яшчэ ўчора і сёньня працягваюць. Але ў некаторых клясах, дзе вучні засталіся, заняткі ідуць».
З дырэктаркай СШ № 212 Вольгай Касалапавай удалося сустрэцца ў вэстыбюлі школы. Вольга Касалапава стаяла ля дзьвярэй і назірала, як настаўніца прымала заявы ад бацькоў, якія заходзілі ў школу. Заявы ад бацькоў несьлі таксама старшаклясьнікі. Заходзілі ў вэстыбюль, а потым выходзілі са школы. Але некаторыя заставаліся і праходзілі ўсярэдзіну. Дырэктарка зь імі віталася.
«Заняткі ў нас спыненыя часткова, у некаторых клясах урокі сёньня адбудуцца, — сказала кіраўніца школы. — Вось Арына прыйшла. У яе заняткі будуць. А ў іншых не. Мы ідзём насустрач тым бацькам, якія пажадалі пакінуць дзяцей дома і напісалі адпаведныя заявы. Гэта іх ініцыятыва. А настаўнікі ўсе працуюць».
Што да прычыны такой сытуацыі, Вольга Касалапава сказала, што гэта зьвязана з эпідэміяй каранавірусу. Але ці сапраўды вучань школы захварэў на COVID-19, Вольга Касалапава пацьвердзіць адмовілася. Адказала: «Пытаньне не да нас».
Ніводзін з супрацоўнікаў школы і наведнікаў ня быў у ахоўнай масцы.
Міністэрства здароўя сытуацыі ў школе № 212 не камэнтавала.
Каранавірус у Беларусі і ў сьвеце. Як разьвіваюцца падзеі >>
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
