На 82-м суднарамонтным заводзе ў Расьлякове Мурманскай вобласьці падчас рамонту авіяносца «Адмирал Кузнецов» патануў плывучы док ПД-50. Пра гэта паведамляюць мясцовыя выданьні «СеверПост» і «Мурманский вестник».
Паводле «СеверПост», каля паўночы ўпалі два вежавыя краны, адзін зь іх — на палубу авіяносца. Паводле папярэдніх зьвестак, ёсьць пацярпелыя: вядома пра трох параненых і аднаго зьніклага бязь вестак. Каля 70 чалавек эвакуаваныя. Да прахадной пад’яжджаюць машыны хуткай дапамогі.
«Новая газета» піша, што падчас выхаду крэйсэра з доку тануць пачаў сам док.
У ВК ёсьць некалькі паведамленьняў пра здарэнне. Наталля Клепачова з Мурманску піша, што пад ваду пайшла «жылая вежа», у якой жыў асабовы склад ПД-50.
Пазьней агенцтва ТАСС паведаміла аб чатырох пацярпелых, трое шпіталяваныя зь пераахаладжэньнем, адзін — з траўмай брушной поласьці. Плывучы док, паводле агенцтва, патануў цалкам. Прычынай аварыі стала раптоўнае адключэньне электрычнасьці. Авіяносец, паводле папярэдніх зьвестак, не пашкоджаны, яго адбуксіравалі на 35-ы суднарамонтны завод.
Плывучы док ПД-50, пабудаваны ў 1980 годзе ў Швэцыі на замову ВМФ СССР, лічыцца адным з найбуйнейшых докаў у сьвеце.
