Выстава беларускай прадукцыі Made in Belarus адкрылася ў Міжнародным выставачным цэнтры ў Кіеве. Яна будзе доўжыцца чатыры дні.
Асноўны акцэнт зроблены на беларускае машынабудаваньне, якое стала галоўным складнікам беларускага экспарту ва Ўкраіну. Беларусь экспартуе сюды прадукцыю машынабудаваньня, нафтахіміі, лёгкай прамысловасьці. З Украіны ў Беларусь пастаўляюць перш за ўсё прадукцыю аграпрамысловага комплексу. Беларуская фармацэўтыка, лёгкая прамысловасьць і турызм таксама гатовыя пашырыць сваю прысутнасьць на ўкраінскім рынку.
Гэта адбываецца ў той час, як Расея абмяжоўвае сваю прысутнасьць з прычыны анэксіі Крыму і вайны на Данбасе.
Украіна цяпер абмежавала свой рынак для расейскай прадукцыі, якая раней тут была ў лідэрах. Раней Украіна падпісала з Эўрапейскім Зьвязам пагадненьне аб асацыяцыі, якое адкрывае новыя магчымасьці для прасоўваньня і беларускай прадукцыі ня толькі на ўкраінскі, а і на эўрапейскі рынак.
Беларуска-ўкраінскі гандаль: рост, падзеньне, зноў рост
За ўсю гісторыю беларуска-ўкраінскіх дачыненьняў 2012 год стаў найбольш удалым для ўзаемнага гандлю — тады ўзаемны таваразварот вырас да 8 мільярдаў даляраў. Кіеў і Менск плянавалі да 2015 году пераадолець 10-мільярдную адзнаку, але сытуацыя памянялася. У 2014 годзе ва Ўкраіне перамаглі Эўрамайдан і Рэвалюцыя годнасьці, зьмянілася ўлада, Расея анэксавала ўкраінскі Крым, а на Данбасе пачаліся баявыя дзеяньні. Украінская эканоміка аслабла, грыўня ўпала амаль у тры разы. Гэта не магло не адбіцца на гандлёвых сувязях Украіны зь Беларусьсю.
Амбасадар Беларусі ва Ўкраіне Ігар Сокал прызнае, што таваразварот упаў з аб’ектыўных прычын.
«Але летась мы ўжо дадалі да ўзроўню 2016 году 20 адсоткаў і дасягнулі 4,6 мільярда даляраў. Сёлета за першыя два месяцы — ужо 700 мільёнаў даляраў (480 — наш экспарт, 220 — украінскія пастаўкі ў Беларусь)», — кажа амбасадар Сокал.
Паводле ягоных падлікаў, сёлета краіны павінны выйсьці на 5,5–6 мільярдаў даляраў таваразвароту за кошт усіх таварных пазыцый.
«Гэты сэктар ва Ўкраіне вельмі моцна разьвіты: зусім іншая зона земляробства, і вырошчваецца тая прадукцыя, якая ў Беларусі не вырошчваецца», — кажа пасол Беларусі ва Ўкраіне Ігар Сокал.
Беларусы могуць удзельнічаць ва ўкраінскіх тэндэрах
Паводле намесьніка міністра эканамічнага разьвіцьця і гандлю Ўкраіны Юрыя Броўчанкі, цяпер Беларусь выйшла на другое месца сярод краін СНД у зьнешнім гандлі Ўкраіны.
Ад 2015 году ўсе бюджэтныя закупы ва Ўкраіне робяцца праз электронную тэндэрную сыстэму Prozorro. Апроч таго, у парлямэнце рыхтуецца закон «Купляй украінскае», які можа ўскладніць удзел беларускіх вытворцаў ва ўкраінскіх дзяржаўных закупах.
«Канкурэнцыя. Сёньня гэта адзінае, што вызначае прысутнасьць на рынку. У нас сапраўды створаная сыстэма Prozorro, і ўсе беларускія прадпрыемствы могуць браць удзел у тэндэрах і пастаўляць сюды сваю прадукцыю. Гэтак жа як і ўкраінскія прадпрыемствы маюць магчымасьць выходзіць на тэндэры ў Рэспубліцы Беларусь», — кажа Юры Броўчанка.
Перавага супольным прадпрыемствам
Паводле словаў Броўчанкі, найбольшую ўвагу варта скіраваць на стварэньне супольных прадпрыемстваў.
«У Беларусі шмат камплектуючых вырабляецца з украінскай сыравіны — гэта і гідраўліка, і мэтал, і чыгун, якія вырабляюцца ва Ўкраіне, завозяцца ў Беларусь, і там ужо вырабляецца канчатковы прадукт. Сёньня мы працуем па некалькіх праектах, якія дазволяць стварыць супольныя прадпрыемствы паміж Украінай і Беларусьсю, адзін зь іх на базе Драгобыцкага заводу аўтамабільных кранаў (Львоўская вобласьць. — РС) супольна зь беларускім „Амкадорам“. І па гэтым праекце мы сёлета будзем працаваць. Гаворка ідзе пра будаўнічую і дарожную тэхніку, але ў першую чаргу — аўтакраны», — сказаў Свабодзе намесьнік міністра эканамічнага разьвіцьця і гандлю Ўкраіны Юры Броўчанка.
Летась ва Ўкраіне працавалі 8 супольных беларуска-ўкраінскіх прадпрыемстваў, сказаў беларускі амбасадар Ігар Сокал.
«У Луцку мы адкрылі прадпрыемства па вытворчасьці тралейбусаў. Аднак мы рэгіструем ня толькі супольныя прадпрыемствы, а і прадстаўніцтвы нашых кампаній. Зарэгістраваныя прадстаўніцтва „Белаўтадар-Украіна“, а таксама кампаніі па вытворчасьці мінэральных угнаеньняў», — дадае беларускі дыплямат Ігар Сокал.
Патэнцыял разьвіцьця ўзаемнага гандлю бакі ацэньваюць аднолькава: рынкі блізкія, Украіна — добрая пляцоўка для далейшага прасоўваньня беларускай прадукцыі ў Эўропу, а Беларусь як сябра Эўразійскай эканамічнай супольнасьці — для ўкраінскіх тавараў у краінах СНД.
Супраца ў ВПК ёсьць, хоць і абмежаваная
Сёлета ў лютым у Дзяржаўным вайскова-прамысловым камітэце Беларусі заявілі, што ўзаемадзеяньні ў гэтай сфэры з Украінаю не рэалізуюцца. Маўляў, Беларусь — пляцоўка для вырашэньня канфлікту на Данбасе і не павінна ствараць дадатковыя праблемы.
Але ў Кіеве заяўляюць: супраца зь Беларусьсю ў галіне ВПК вядзецца.
«Яна вельмі абмежаваная, але адбываецца. Дэталі я ня буду камэнтаваць», — сказаў у інтэрвію Свабодзе намесьнік міністра эканамічнага разьвіцьця і гандлю Ўкраіны Юры Броўчанка. Сёньня ён праехаў у кабіне ралійнага МАЗа. Шасі Менскага аўтамабільнага заводу ўсё часьцей выкарыстоўваюцца ў вытворчасьці вайсковай тэхнікі ва Ўкраіне.
Беларускай прадукцыі ва Ўкраіне будзе больш, — амбасадар
Амбасадар Беларусі ва Ўкраіне Ігар Сокал мяркуе, што працаваць зь беларускімі вытворцамі для ўкраінскіх кампаній выгадна. У тым ліку таму, што ў Беларусі створаны такі інстытут падтрымкі, як экспартнае крэдытаваньне — калі замежная кампанія, якая купляе ў крэдыт беларускую прадукцыю, можа разьлічваць на пагашэньне часткі адсоткаў па крэдыце з боку беларускага Міністэрства фінансаў. Беларусь штогод выдаткоўвае на гэта каля 200 мільёнаў даляраў. Ва Ўкраіне такія апэрацыі абслугоўвае «Укргазбанк».
