Калі вы задрэмлеце на працоўным месцы — вас ніхто не зразумее. Сучасная працоўная этыка не прадугледжвае пасьляабедзенную сыесту на працы. Тым ня менш, навукоўцы сьведчаць, што кароткі сон можа павысіць прадукцыйнасьць.
Прадукцыйнасьць і сон
Кампаніі маюць вялікія праблемы з прадукцыйнасьцю працы, бо людзі ўсё больш падпадаюць пад узьдзеяньне працоўнага стрэсу і не пасьпяваюць аднаўляцца на працягу працоўнага дня, — кажа экспэрт The New York Times Джош Бэрcын.
Паводле Бэрсына, многія кампаніі пачынаюць разумець, што гэта іх праблема, але ня могуць проста сказаць людзям: «Ідзіце і самі вучыцеся як правільна наладзіць балянс паміж працай і жыцьцём».
абедзенныя перапынкі ці перапынкі на каву могуць быць прыдатныя для кароткага сну
Так ці іначай, але магчымасьць задрамаць на працы сёньня шырока не распаўсюджана. Мала хто з нас можа дазволіць сабе раскошу адысьці з працоўнага месца на паўгадзінкі паспаць. Але вось абедзенныя перапынкі ці перапынкі на каву могуць быць прыдатныя для кароткага сну. Галоўнае, каб начальства не было супраць.
У ідэальным сьвеце мы ўсе маглі б вырашыць гэтую праблему праз раньняе пакладаньне ў ложак і здаровы начны сон.
У Японіі нават ёсьць спэцыяльнае слова для абазначэньня кароткага сну падчас працы — «inemuri», якое можа прыкладна перакласьці як сон падчас прысутнасьці.
Нядаўна было праведзена дасьледаваньне, вынікі якога публікаваліся ў часопісе Nature Neuroscience. Навукоўцы чатыры разы на працягу працоўнага дня правяралі прадукцыйнасьць людзей. Яна пагаршалася з кожным тэстам, але людзі, якія мелі 30-хвілінны сон паміж тэстамі, спынілі падзеньне прадукцыйнасьці, а тыя зь іх, хто меў 60-хвілінны сон, нават аднавілі яе цалкам.
Такое самае ўзьдзеяньне на чалавека аказвае паўнавартасны начны сон.
Карысьць ад кароткіх перапынкаў на сон
Яшчэ адзін экспэрт, якога цытуе The New York Times, — доктарка Сара Мэднік, аўтарка кнігі «Пасьпіце! Зьмяніце сваё жыцьцё» — сьцьвярджае, што кароткі сон працягласьці ад 20 да 60 хвілін можа дапамагчы чалавеку з запамінаньнем інфармацыі і яе апрацоўкай.
А калі ваш сон доўжыцца больш за 60 хвілін, вы ўступаеце ў фазу сну, якая называецца фазай нерухомых вачэй — па-ангельску non-rapid eye movement або скарочана R. E. M. Гэтая фаза блізкая да таго, што называецца глыбокі сон.
R. E. M. сон паляпшае творчыя здольнасьці, успрыманьне інфармацыі, яе апрацоўку і высока асацыятыўнае мысьленьне, што дазваляе зрабіць сувязі паміж разнастайнымі ідэямі, кажа доктарка Мэднік.
сон паляпшае творчыя здольнасьці, успрыманьне інфармацыі, яе апрацоўку і высока асацыятыўнае мысьленьне
Перапынкі на сон карысныя ня толькі для сучаснага чалавека. Навукоўцы вывучалі даіндустрыяльныя супольнасьці паляўнічых-зьбіральнікаў ў Танзаніі, Намібіі і Балівіі. Аказалася, што пасьляабедзенны сон вельмі карысны для ўсіх. Паляўнічыя, напрыклад, зь яго дапамогай маглі паляпшаць меткасьць. Вынікі гэтага дасьледаваньня былі апублікаваныя ў 2015 годзе ў часопісе Current Biology.
Сёньня навукоўцы называюць стабільны графік сну і сем ці восем гадзін сну кожную ноч рэальным Сьвятым Граалем здароўя сучаснага чалавека.
Так што, калі ў вас ёсьць магчымасьць дома ці на працы паспаць 20-30 хвілін, зрабіце наступнае:
• Знайдзіце ціхае, незанятае месца, дзе ніхто не патрывожыць.
• Паспрабуйце, максымальная яго зацямніць. Маска для вачэй і затычкі для вушэй таксама дапамогуць.
• Пасьпіце каля 20 хвілін. Пры даўжэйшым сьне вы можаце прачнуцца з пачуцьцём санлівасьці.
