Пра гэта паведаміў Надзвычайны і Паўнамоцны пасол Беларусі ў Францыі і Гішпаніі Павал Латушка ў эфіры тэлеканалу «Беларусь-1».
«Грамадзяне Беларусі зьвяртаюцца ў пасольства на гарачую лінію з просьбай паспрыяць ім. Найперш гэта тычыцца пытаньняў пра магчымасьць вярнуцца на радзіму рэйсамі авіякампаніі „Белавія“. Мы пацьвярджаем, што сапраўды аніводзін з рэйсаў нашай авіякампаніі не адменены, грамадзяне Беларусі могуць абсалютна спакойна і бясьпечна вярнуцца дахаты», — паведаміў Павал Латушка.
Тэлефон пасольства Беларусі ў Францыі — +33 1 44-14-69-75.
Таксама можна зьвяртацца на нумар консула Беларусі ў Францыі +33 6 09-78-41-40. (Пры званку з стацыянарнага тэлефона зь Беларусі замест «+» набіраецца 8-10-).
Павал Латушка пацьвердзіў, што на дадзены момант інфармацыі пра пацярпелых у парыскіх тэрактах грамадзянах Беларусі няма, паведамляе БЕЛТА.
Адзін беларус быў у канцэртнай залі Bataclan падчас нападу. Ён у бясьпецы і не пацярпеў.
13 лістапада ў Парыжы ў выніку шасьці тэрарыстычных атак загінулі 129 і пацярпелі больш за 300 чалавек. Адказнасьць узяла на сябе групоўка «Ісламская дзяржава».
