Ітан Голдрыч: Коміксы прымушаюць людзей сьмяяцца і думаць
6 лютага Часовы павераны ў справах ЗША ў Беларусі Ітан Голдрыч наведаў ХХІ Менскую міжнародную кніжную выставу-кірмаш і прадставіў публіцы стэнд амбасады ЗША «Даведайся пра Амэрыку па коміксах».
Амбасада ЗША бярэ ўдзел у Менскай міжнароднай кніжнай выставе-кірмашы ўжо 17-ты раз. Сёлета экспазыцыя амэрыканскай амбасады ў Беларусі тэматычная — шырока прадстаўленыя коміксы на самыя розныя тэмы. Па коміксах у Амэрыцы вучаць дзетак чытаць. Па коміксах ва ўнівэрсытэтах вывучаюць сур’ёзныя прадметы. Да прыкладу, 7 лютага на кніжнай выставе адбудуцца інтэрактыўныя заняткі «Коміксы і графічныя навэлы для разьвіцьця навыкаў чытаньня, пісьма і візуальнай пісьменнасьці».
Часовы павераны ў справах ЗША ў Беларусі Ітан Голдрыч апавёў, што коміксы ў ЗША — жанр як літаратуры, так і выяўленчага мастацтва. Яны прымушаюць людзей сьмяяцца і прымушаюць думаць. І паказаў прысутным кнігу коміксаў «Mouse» — пра Другую ўсясьветную вайну і Галакост:
«Коміксы могуць стварацца на самыя розныя тэмы. І галоўная задача, якую выконваюць комікс-пэрсанажы і комікс-карцінкі — гэта данесьці пэўнае пасланьне да чытача. Гэта можа несьці і нейкую палітычную афарбоўку, гэта можа быць вельмі сур’ёзным драматычным творам. Вось графічны раман, які называецца „Mouse“ — пра падзеі Другой усясьветнай вайны, пра Галакост. Прычым пэрсанажы — жывёлы, але пэрсаніфікуюць яны людзей і падзеі Другой усясьветнай...»
Фотагалерэя:
Ітан Голдрыч: Коміксы прымушаюць людзей сьмяяцца і думаць
6 лютага Часовы павераны ў справах ЗША ў Беларусі Ітан Голдрыч прадставіў публіцы стэнд амбасады ЗША «Даведайся пра Амэрыку па коміксах».
Хоць журналістаў прасілі задаваць пытаньні толькі па тэме выставы альбо пра беларуска-амэрыканскае супрацоўніцтва ў галіне культуры, але былі закрануты і іншыя праблемы. У прыватнасьці — пра візавыя праблемы. Калі амэрыканская амбасада ў Беларусі запрацуе ў поўным складзе і пачне выдаваць візы ў Менску? Ітан Голдрыч адказаў так:
«Магу сказаць, што ў сьнежні да нас прыяжджаў афіцыйны прадстаўнік з Вашынгтону, прайшлі абмеркаваньні з прадстаўнікамі афіцыйных уладаў Беларусі. Думаю, калі ў нас будуць навіны, будзе што вам паведаміць — мы абавязкова гэта зробім».
Калі Ітан Голдрыч прыехаў працаваць у Беларусь, ён паабяцаў пачаць вывучаць беларускую мову — ягоны папярэднік Джордж Крол за час сваёй кадэнцыі беларускай мовай авалодаў. На пытаньне, як прасоўваецца вывучэньне беларускай мовы, Часовы павераны ў справах ЗША ў Беларусі Ітан Голдрыч адказаў:
«Я ўсё яшчэ бяру ўрокі, на адным з апошніх мы чыталі вершы. Якраз роўна год таму, пасьля леташняга ўдзелу амбасады ў кніжным кірмашы, я вывучыў „Зорку Вэнэру“, нядаўна мы чыталі „За ўсё, што сёньня маю“. Але, вядома, мне трэба прайсьці яшчэ вельмі доўгі шлях».
