په کراچۍ کې د ترهګرۍ ضد عدالت د فبرورۍ پر ۱۵مه د پښتون ژغورنې غورځنګ د يو مخکښ او په قامي اسمبلۍ کې د جنوبي وزیرستان استازي علي وزير د ضمانت درخواست رد کړ. پر نوموړي د رياست او ریاستي ادارو پرضد له کرکې ډکې ويناګانو تور دی چې هغه یې ردوي. د علي وزیر پرضد جوړې مقدمې د پاکستان د مهمو سیاسي مسلو په توګه یادېږي او د بشري حقونو سازمانونو په بیا بیا پر حکومت غږ کړی چې هغه خوشې کړي. پښتون ژغورنې غورځنګ هم د فبرورۍ له ۱۳مې راهیسې په کراچۍ کې د علي وزیر د خوشې کېدو د غوښتنې لپاره د سيند اسمبلۍ مخې ته پرلت وهلی دی چې لا هم دوام لري. پوښتنه دا ده چې د علي وزیر پرضد مقدمه سياسي که قانوني انګېزه لري؟ دا او نورې پوښتنې د مشال تر رڼا لاندې بحث شوې دي چې تاسې یې د غږ په ځای کې اورېدای شئ.
د مشال تر رڼا لاندې
وبښئ، دلته ۱۷ فبروري هېڅ و نه موندل شول. تر دې پخواني مطالب وګورئ.
چار شنبه ۱۶ فبروري ۲۰۲۲
د پاکستان په سياست او رسنيو کې د بلوچستان د شخړې په اړه یو وار بیا بحثونه تاوده شوي دي. دا تر هغې وروسته ده چې د فبرورۍ پر دويمه نېټه بلوڅ بېلتونپالي وسله وال په پنجګور او نوشکي ضلعو کې د امنيتي ځواکونو مرکزونو ته ننوتل چې ورسره سم، د هغوی او حکومتي عسکرو ترمینځ نښتې پیل شوې. په نوشکي کې نښتې د فبرورۍ پر درېیمه پای ته ورسېدي خو په پنجګور کې تر درو ورځو پورې روانې وې. د بريدونو ذمه واري بلوڅ بېلتونپالې ډلې بلوچ لېبرېشن ارمي (بي اېل اې) منلې وه. د پاکستان پوځ د عامه اړيکو ادارې (ای اېس پي ار) وايي چې په نښتو کې نهه عسکر او۲۰ وسله وال وژل شوي دي. خو بي اېل اې د خپلو ۱۶ وسله والو او تر ۱۰۰ څخه د زیاتو سرتېرو د وژنو دعوه کوي. مشال راډیو په خپلواکه ډول د دواړو غاړو د دعوو تصديق نه شي کولای. د بلوڅ بېلتونپالو چې له تېرو شاوخوا ۱۶ کلونو راهيسې د پاکستان پرضد وسله واله جګړه کوي، دومره لويو حملو زیاتره خلک حیرانه کړي دي. د پاکستان پوځ به ادعا کوله چې په بلوچستان کې يې د بلوڅ وسله والو ملا ورماته کړې ده. پوښتنه دا ده چې بلوڅ وسله والو د دومره لویو حملو توان څنګه پیدا کړ او ایا د بلوچستان د شخړې یو تلپاتی حل شته او که څنګه؟ دا او نورې پوښتنې په مشال تر رڼا لاندې خپرونه کې څېړل شوې دي چې تاسې یې د غږ په ځای کې اورېدای شئ.
