د اروپايي ټولنې د پراخوالي کمېشنرې مارتا کاس "د ازادې اروپا راډیو د ساتنې پر اړتیا ټینګار کړی دی" او خبرداری یې ورکړی چې که داسې و نه شي، نو دا به "د نړۍ مستبدانو ته یوه ښه ډالۍ وي."
نوموړې دا څرګندونې د اپرېل پر لومړۍ نېټه د اروپايي ټولنې پارلېمان په غونډه کې وکړې.
د فرانسې په ستراسبورګ کې د پارلېمان ناسته تر ډېره د ازادې اروپا راډیو په ګډون ډېموکراټیکو رسنیو ته د لاسرسي پر خوندیتوب متمرکزه وه.
د امریکا ولسمشر ډانلډ ټرمپ د مارچ پر ۱۴مه په فرمان کې د اووه وفاقي ادارو د کمولو امر وکړ چې پکې د امریکا د نړیوالو رسنیو اداره (یو اېس اې جي اېم) هم شامله ده چې د ازادې اروپا راډيو یې برخه ده.
د ټرمپ تر امر څو ساعته وروستیو رسنيو د يو اېس اې جي اېم خپور کړی ليک خپور کړ چې پکې راغلي چې د ازادې اروپا راډيو تمويلوونکې پیسې ختموي.
هغه خط کیري لېک لاسلیک کړی دی چې پکې د هغې له نامه سره ليکلي چې "د يو اېس اې جي اېم د سرپرست مشر لوړپوړې سلاکاره" ده او د هغه واکونه لري. ولسمشر ټرمپ نوموړې د امریکا غږ راډیو د مشرۍ دندې ته نوموړې وه او د هغې ګومارنه باید د یو اېس اې جي اېم مشورتي بورډ تایید کړي.
تر دې وروسته ازادې اروپا راډیو د مارچ پر ۱۸مه د یو اېس اې جي اېم او د چارواکو کیري لېک او وېکټور مورالېس پرضد مقدمه دایره کړه.
د مقدمې په درخواست کې ویل شوي چې پر ازادې اروپا راډیو د کانګرس تصویب کړې پیسې بندول د امریکا د ایین او وفاقي قوانینو سرغړونه ده، ځکه چې اساسي قانون کانګرس ته د وفاقي لګښتونو د چارو ځانګړی واک ورکړی دی.
مشال راډيو د ازادې اروپا راډيو يوه څانګه ده او مرکزي دفتر یې د چېک جمهوریت په پلازمېنه پراګ کې دی.
یو اېس اې جي اېم د مارچ پر ۲۴مه تر اورېدنې لږ ساعت مخکې ژمنه وکړه چې ازادې اروپا راډیو ته د کانګرس له تایید کړې بودیجې څخه شاوخوا اووه نیم مېلیونه ډالره ورکوي. دا پیسې د مارچ په لومړیو دوو اونیو کې د راډیو د لګښتونو لپاره وې چې یو اېس اې جي اېم نه وې ورکړې.
د امریکا په پلازمېنه واشنګټن ډي سي کې یو ابتداییه عدالت د مارچ پر ۲۵مه د قضیې تر اورېدنې یوه ورځ وروسته په خپل امر کې د لنډمهالي توقف په اړه د ازادې اروپا راډیو غوښتنه ومنله.
ازادې اروپا راډیو هیله ښوولې ده چې د بودیجې د بندېدو خلاف مقدمه به وګټي.
تر دې وروسته د کیري لېک پر ازادې اروپا راډیو د بودیجې بندولو له اقدامه په شا شوې ده خو لا یې هم ورته د کانګرس تایید کړې پیسې نه دي ورکړې چې له کبله یې د راډیو مشرتابه یوشمېر کارکوونکي په لنډمهالې رخصتۍ کورونو ته لېږدولي دي.
د اروپايي ټولنې د پراخوالي چارو کمېشنرې مارتا کاس د اپرېل پر لومړۍ پارلېمان ته د ټولنې د بهرنیو چارو تګلارې مشرې کایا کلاس په استازیتوب وینا وکړه.
هغې وویل: "اروپايي ټولنه باید د روسیې او بېلاروس په ګډون" له نورو ستونزو څخه د "د خپلواکو رسنیو" ژغورلو لپاره "ورته پناه ورکړي چې هغوی خپل کار وکړای شي، له خپلو سیاسي او کاروباري مشرانو حساب وغواړي او درغلۍ (ادارې فساد) په ډاګه کړي."
کاس د ازادې اروپا راډیو د تمویل په برخه کې د اروپايي ټولنې له لوري د اقدام پر امکان له خبرو ډډه وکړه خو د پارلېمان یوشمېر غړو د دې نظر یادونه وکړه.
ازادې اروپا راډیو هڅه کوي چې د ۲۰۲۵ز مالي کال لپاره ورته د کانګرس د تایید کړې بودیجې پاتې برخه، چې شاوخوا ۷۷ مېلیونه ډالر جوړېږي، ترلاسه کړي.
د امریکا د نړیوالو رسنیو اداره یوه خپلواکه وفاقي اداره ده چې د عامه خدماتو رسنیزې شبکې څاري.
د یو اېس اې جي اېم تر څار لاندې رسنۍ هره اونۍ د نړۍ نېږدې ۳۶۱ مېلیونه کسانو ته په شاوخوا ۵۰ ژبو خبرونه او معلومات ورکوي.
