د خیبر پښتونخوا حکومت د سوات ضلعې په دوه برخو کې په وېشلو سره د بر سوات په نامه د نوې ضلعې د جوړولو اعلان کړی دی.
د اعلا وزیر د اطلاعاتو سلاکار بیرسټر محمد علي سیف د اکتوبر پر درېیمه په یوه خبرپاڼه کې د حکومت د دغې پرېکړې اعلان وکړ. دا پرېکړه د اکتوبر پر دویمه د خیبر پښتونخوا د اعلا وزیر علي امین ګنډه پور په مشرۍ د صوبايي کابینې په غونډه کې وشوه.
په دې اړه د سوات په مټه تحصیل کې د اکتوبر پر درېيمه جوړې شوې يوې غونډې ته د وينا پر وخت له سواته د صوبايي اسمبلۍ غړي فضل حکیم وویل چې حکومت دا پرېکړه د ولس د غوښتنې په رڼا کې کړې ده.
د سوات اوسېدونکو پر دې پرېکړې بېلا بېل غبرګونونه ښوولي دي. ځینې اوسېدونکي وايي چې د سوات په دوه برخو کې په وېشل کېدو سره به د ولس د ستونزو په هواري کې اسانتیا پیدا شي. خو ځيني بیا وايي چې په دې پرېکړې سره به د سوات تاریخي حیثیت اغیزمن شي.
له رسمي شمېرو سره سم د سوات ابادي دا وخت شاوخوا ۲۷ لاکه ده او دا ضلع اووه تحصیلونه لري.
