د اعظم ورسک سيمې اوسېدونکو له حکومته د امنيت ټينګولو غوښتنه کړې ده
د کوز جنوبي وزیرستان د اعظم ورسک سیمې اوسېدونکو له حکومته غوښتنه کړې ده چې د سیمې د امنيتي حالاتو ښه کولو لپاره دې خپل مسوليت ادا کړي. د اکتوبر پر درېيمه د ولسي پاڅون په نامه د احتجاج پر مهال ځايي ولس وويل چې د ناامنۍ له امله يې ژوند له ستونزو سره مخامخ شوی دی. بلخوا د جنوبي وزيرستان انتظامي چارواکي وايي چې د امنيتي حالاتو د ښه کولو لپاره پوځ او پوليس په شريکه ګامونه پورته کوي او په هغه ضلع کې يې د وسلوالو پرضد هدفي عمليات پيل کړي دي.