په باجوړ کې د خیبر پښتونخوا اسمبلۍ د ۲۲مې حلقې د څوکۍ ډکولو لپاره د رايو اچولو بهیر روان دی.
د جولای پر ۱۱مه په هغه ضمني انتخاب کې د ووټ اچولو بهیر د سهار پر اتو بجو پیل شو چې د انتخاباتي کمېشن په وینا، بې له ځنډه به د مازیګر تر پینځو بجو روان وي.
په پېښور کې د انتخاباتو کمېشن ويلي چې په انتخاب کې د ۱۲ کانديدانو ترمینځ سيالي ده چې پکې پینځه د سیاسي ګوندونو غړي دي او نور خپلواکه نوماندان دي.
کمېشن وايي چې په هغه حلقه کې شاوخوا ۱۷۹،۰۰۰ راجسټر رایه ورکوونکي دي او د ووټ اچولو لپاره هلته ۹۱ مرکزونه جوړ شوي دي. کمېشن ۶۶ مرکزونه له امنیتي پلوه حساسه ګرځولي دي. خو د باجوړ پوليس وايي چې د امنیت لپاره يې ټول اړين ګامونه پورته کړي دي.
د روان ۲۰۲۴ز کال د اپرېل ۲۱مې په ضمني ټاکنو کې مبارک زېب خان د قامي او صوبايي اسمبلیو دواړه څوکۍ ګټلې وې چې وروسته يې د قامي اسمبلۍ هغه وساتله او صوبايي يې پرېښودله.
په پاکستان کې د روان ۲۰۲۴ز کال د فبرورۍ پر اتمه عام انتخابات شوي ول خو پر ځینو حلقو د امنیت خراب وضعیت او په باجوړ کې په حمله کې د یو نوماند رېحان زېب تر وژنې وروسته انتخابات ځنډېدلي ول.
