د پاکستان د پنجاب صوبې په ملتان ښار کې د يوه درې پوړيزه کور د چت راپرېوتو په پېښه کې نهه کسان وژل شوي چې اووه يې د یوې کورنۍ غړي دي.
د ژغورنې او مرستندويه چارو ادارې (رېسکيو ۱۱۲۲) په خپاره کړي بيان کې ويلي دي چې پېښه نن (د مارچ پر ۱۲ مه) د ملتان له حرم ګېټ څلور لارې سره نېږدې رامينځ ته شوه چې د ودانۍ د راپرېوتو په نتيجه کې ۱۱ کسان تر ملبې لاندې شوي ول.
د رېسکيو ۱۱۲۲ ضلعي چارواکي ډاکټر کليم الله له رسنيو سره په خبرو کې ويلي دي چې د پينځو ساعتونو تر عملياتو وروسته يې نهه مړي او دوه ژوبل کسان له ملبې راايستلي دي.
چارواکي زياته کړه چې پېښه د ګېس سلنډر چاودېدو له وجې رامينځ ته شوې ده.
د ملتان مرستيال کمېشنر او پولیس چارواکي د پېښې ځای ته رسېدلې دي او د نورو پلټنو لپاره يې کار پيل کړی دی.
