د امریکا د ناروغیو د کنټرول او مخنیوي ادارې "سي ډي سي" د نومبر پر ۱۹مه د کورونا وایرس په وړاندې د مدافعت لا زیاتولو لپاره د بوسټر په نامه د دریم واکسینو لګول لاسلیک کړ.
دا تر هغې څو ساعته وروسته وه چې د ماهرینو یوې خپلواکې ډلې وویل چې د ماډرنا او فایزر -بایو این ټیک واکسینو دریم خوراک اخیستل د کورونا وایرس خلاف مدافعت زیاتوي.
تر دې وړاندې د کورونا وایرس دریم واکسین تر پنځه شپېته کاله زیات عمر لرونکو، کم قوت مدافعت لروونکو، د سختې ناروغۍ له زیات خطر سره مخامخ خلکو او د هغو لپاره منظور شوي وو چې د زیات خطر په حالاتو کې کار کوي.
د ناروغیو د کنټرول او مخنیوي ادارې په مشخصه توګه وړاندېز نه دی کړی چې ټول لویان دې د کورونا وایرس دریم واکسین ولګوي خو وې ویل چې خلک کولای شي په خپله خوښه ځان واکسین کړي.
د نویو اصولو له مخې لویان کولای شي چې د خپل دویم واکسین شپږ میاشتې وروسته د فایزر او یا ماډرنا واکیسن ولګوي.
ادارې ویلي چې خلک کولای شي چې که مخکې یې د یوې کمپنۍ واکسین لګولی وي، وروسته په دغو دواړو کې د کومې یوې هغه واکسین ولګوي.
