Ҷабҳаи муқовимат дар Панҷшер хабари суқути ин вилоят ба дасти Толибонро рад кард.

Шаби 3-юми сентябр Толибон иддао карданд, ки вилояти Панҷшерро тасарруф кардаанд.

Аҳмад Масъуд, фармондеҳи Ҷабҳаи муқовимат дар саҳифаи Твитери худ навиштааст, ки “ин хабар дуруғ аст”. Ба қавли ӯ, ин хабарро матбуоти Покистон, ки аз Толибон ҷонибдорӣ мекунанд, бофтаанд.

“Суқути Панҷшер рӯзи охири ман хоҳад буд”,­--навиштааст ӯ.

Бисмиллоҳ Муҳаммадӣ, вазири пешини дифои Афғонистон низ дар саҳифаи Твитер тасарруфи Панҷшерро рад кардааст. Ба гуфтаи ӯ, чунин хабарҳо ба хотири шикасти рӯҳияи муборизон эҷод мешаванд.

Хабаргузории Ройтерз шаби 3-юми сентябр бо такя ба манобеи худ дар миёни мақомоти Толибон аз тасарруфи Панҷшер хабар дод, вале дертар аз қавли мақомоти Ҷабҳаи муқовимат гуфтаҳои Толибонро рад кард.

Ҷабҳаи муқовимат аз кушта шудани даҳҳо Толиб дар чанд соати охир хабар медиҳад. Толибон ҳанӯз расман хабарҳои талафоти шаби 3-юми сентябр дар Панҷшерро рад ё тасдиқ накардаанд.

Аз ин пеш, хабар нашр шуд, ки Амруллоҳ Солеҳ, муовини пешини президенти Афғонистон ба Тоҷикистон фирор кардааст. Ӯ дар наворе зоҳир шуд ва гуфт, ки дар Панҷшер қарор дорад. Ба гуфтаи Солеҳ, ҷангҳои шадид дар Панҷшер идома дорад ва ӯ то охирин лаҳза он ҷо мемонад.

Толибон, ки рӯзи 15-уми август бидуни ҷанг Кобулро ишғол карданд, дар як ҳафтаи охир барои тасарруфи Панҷшер вориди ҷанг шудаанд. Ҳарду ҷониб иддао доранд, ки ба ҳамдигар талафоти сангин ворид карданд.

Панҷшер ягона вилояти Афғонистон аст, ки аз ҷониби Толибон тасарруф нашудааст. Толибон рӯзи гузашта эълон карданд, ки музокира бо Ҷабҳаи муқовимат дар Панҷшер натиҷа надодааст ва онҳо бо роҳи ҷанг вилоятро тасарруф хоҳанд кард. Ба гуфтаи масъулони Ҷабҳаи муқовимат, як ҳафта боз ҷанг дар Панҷшер давом дорад ва Толибон барқу алоқа ба ин вилоятро қатъ кардаанд.

Як зодаи Тоҷикистон, ки дар сафи нирӯҳои мусаллаҳи Русия дар ҷанги зидди Украина кушта шудааст, дар вилояти Владимир ба хок супурда шуд. Ба навиштаи маъмурияти шаҳри Юрйев-Полскии вилояти Владимир, рӯзи 26 сентябр дар ин шаҳр маросими хоксупории Исломиддин Ҳикматович Раҳматови 23-сола баргузор шуд.

Дар хабари мақомот омадааст, ки Исломиддин Раҳматов соли 2002 дар Тоҷикистон таваллуд шуда баъдан ба Русия кӯчид. Ӯ бо вазорати мудофеаи Русия барои хидмати ҳарбӣ созишнома имзо кард ва дар артиш дар рутбаи снайпер ва разведкачии калон ё сарбози калони иктишофӣ хидмат мекард.

Ҷузъиёти бештар дар бораи марги ин низомӣ нашр намешавад, танҳо дар хабари расмӣ омадааст, ки Исломиддин моҳи августи соли 2025 «ба ҳангоми иҷрои супоришҳое дар ҷараёни амалиёти махсуси ҳарбӣ (мақомоти Русия ҷанги зидди Украинаро чунин ном мебаранд) дар қаламрави Украина, ЛНР, ДНР ҷон бохт».

Ба иттилои расмӣ, Раҳматовро дар шаҳри Юрйев-Полскии вилояти Владимир ба хок супурданд. Мақомоти ин шаҳр ё матбуоти дигари маҳаллӣ, ки хабарро бознашр кардааст, ҷузъиёте аз ин беш намедиҳад.

Раҳматов, ба эҳтимоли зиёд, яке аз даҳҳо зодагони Тоҷикистон аст, ки бо қабули шаҳрвандии Русия барои ширкат дар ҷанги зидди Украина сафарбар шудаанд.

Шумори дақиқи тоҷикону тоҷикистониёне, ки аз тарафи Русия дар ин ҷанг иштирок мекунанд, нашр намешавад. Аз ҷумла, Ҳабибулло Воҳидзода, додситони кулли Тоҷикистон моҳи август дар як нишасти хабарӣ гуфт, «шумори расмии зодагони Тоҷикистон, ки дар Украина меҷанганд, мавҷуд нест».

Вале ба ҳисоби тарҳи давлатии Зистан мехоҳам"-и Украина, аз оғози соли 2025 беш аз 600 зодаи Тоҷикистон бо артиши Русия қарордод баста, ба ҷанг рафтаанд. Ин тарҳ дар маҷмӯъ номи 930 Тоҷикистониро нашр кард, ки ба ҷанг пайвастаанд ва тақрибан 200 нафарашон ҳам кушта шудаанд. Ба гуфтаи муаллифони пажӯҳиш, аксарият аз зиндонҳо ва қисме ҳам аз сохтмону бозорҳо ба ҷанг сафарбар шудаанд. Ба ин роҳ онҳоро бо ваъдаи раҳоӣ аз зиндон, пули калон ва ё пешниҳоди шиносномаи русӣ ҷалб мекарданд.

Ҳукумати Толибон дар Афғонистон рӯзи 28-уми сентябр як шаҳрванди дигари Амрикоро озод кардааст. Амир Амириро баъд аз дидори Адам Бёлер, фиристодаи вижаи Амрико дар умури гаравгонҳо раҳо карданд.

Ба гуфтаи давлати Амрико, Амирӣ аз моҳи декабри соли 2024 дар боздошт буд ва бо миёнҷигарии Қатар озод шуд.

Марко Рубио, вазири корҳои хориҷии Амрико бо нашри паёме дар шабакаи X (Твиттер) озодии Амириро тасдиқ ва аз Қатар барои кумак дар ин кор миннатдорӣ кардааст.

Вазорати корҳои хориҷии Толибон пештар дар шабакаи X эълом кард, ки "Имороти исломии Афғонистон имрӯз як шаҳрванди Амрикоро бо номи Амир Амирӣ аз зиндон озод кард".

Як манбаи огоҳ ба хабаргузории "Ройтерс" гуфтааст, Амирӣ панҷумин шаҳрванди Амрико аст, ки имсол бо миёнҷигарии Қатар аз сӯи Толибон озод шудааст.

Муовини раисҷумҳури Амрико мегӯяд, дар ҳафтаи ахир Русия музокироти дуҷониба бо Украина ва гуфтугӯи сеҷонибаро бо Амрико рад кардааст.

Ҷей Ди Венс дар гуфтугӯ бо шабакаи Fox News гуфт, "мо тарафдори сулҳ ҳастем, аммо барои ин кор ҳузури ду тараф лозим аст". Венс умедворӣ кардааст, ки Маскав "бедор шуда, воқеиятро қабул мекунад".

Қаблан Доналд Трамп, раиси ҷумҳури Амрико аз нияташ барои гузарондани вохӯрии сеҷониба бо роҳбарони Русия ва Украина хабар дода буд. Президенти Русия барои вохӯрӣ бо Владимир Зеленский мувофиқа кардааст, аммо расидан ба тавофуқ дар масъалаи калидиро бо Киев имконнопазир гуфтааст.

Дар ҳамин ҳол маъмурияти Доналд Трамп мавзӯи интиқоли мушакҳои дурпарвози "Томагавк"-ро аз тариқи НАТО баррасӣ дорад. Ба гуфтаи Ҷей Ди Венс, тасмими ниҳоиро раиси ҷумҳур Доналд Трамп мегирад.

Рӯзномаи The Wall Street Journal пештар хабар дода буд, ки Трамп ба фиристодани мушакҳои дурпарвоз ба Украина мухолифат надорад.

Марк Рютте, дабири кулли НАТО эълон кардааст, ки ба эҳтимоли зиёд ҷанг миёни Русия ва Украина аз роҳи музокирот хотима меёбад. Рютте ваъда додааст, ки баъди ҳосил шудани тавофуқ ба Украина кафолати амниятӣ дода мешавад.

Расонаҳои покистонӣ аз кушта шудани як фармондеҳи тоҷикистонии ДОИШ дар шаҳри Мазори Шарифи Афғонистон хабар додаанд. Аз ӯ Муҳаммад Эҳсонӣ ном бурда шудааст, ки бо исми "Анвар" низ маъруф будааст.

Шабакаи телевизионии Покистон "24News" бо такя ба манобеъи амниятӣ гуфтааст, ки ин фармондеҳи шохаи "Хуросон" - и ДОИШ дар тарҳрезӣ ва иҷрои ҳамлаи маргталабона дар Пешовар дар соли 2022 даст дошт. Дар ин ҳамла 67 нафар кушта шуданд. Хабари кушта шудани Муҳаммад Эҳсониро телевизиони форсизабони "Афғонистон интернешнл" ҳам пахш кардааст.

Бар асоси ин гузориш, Муҳаммад Эҳсонӣ масъули ҷалб ва омӯзиши бомбгузорони маргталаби тоҷик барои анҷоми ҳамлаҳо дар хоки Покистон будааст. Вокуниши мақомоти Тоҷикистон дар робита ба кушта шудани фармондеҳи тоҷики ДОИШ маълум нест. Номи Муҳаммад Эҳсонӣ қаблан дар расонаҳо пахш нашуда буд ва барои ҳамин дар бораи шахсияташ маълумоте дар даст нест.

Созмони Милали Муттаҳид қаблан дар гузорише гуфта буд, ки ҳудуди ду ҳазор ҷангҷӯи ДОИШ дар Афғонистон ҳузур доранд. Аммо Толибон ин гузоришҳоро "таблиғ" хонда гуфтанд, гуруҳи тундрави ДОИШ дар Афғонистон ҳузур надорад.

Пештар гузоришҳое аз ҳузури Гулмурод Ҳалимов, фармондеҳи собиқи нерӯҳои вижаи Вазорати умури дохилии Тоҷикистон ва Муҳаммад Шарифов, маъруф ба Маҳдӣ Арсалон дар Афғонистон нашр шуда буд. Моҳи августи имсол як намояндаи додситонии кулли Тоҷикистон гуфт, мақомоти қудратии кишвар дар бораи зинда ва дар Афғонистон будани Гулмурод Ҳалимов ва Муҳаммад Шарифов маълумоти дақиқ дар даст надоранд.

Як вакили Маҷлиси намояндагони Тоҷикистон пешниҳод кардааст, ки дастрасии наврасони то 14-сола ба шабакаҳои иҷтимоӣ пурра манъ карда шавад. Вакил ҳамчунин пешниҳод кардааст, ки наврасони 14-17-сола танҳо бо иҷозаи хаттии волидайн аз шабакаҳои иҷтимоӣ истифода баранд.

Дилноза Аҳмадзода дар мақолае, ки нашрияи расмии "Народная газета" чоп кард, навиштааст, манъи дастрасии наврасон ба шабакаҳои иҷтимоӣ онҳоро аз маълумоти зараровар ҳифз мекунад.

Мақолаи Аҳмадзода охири моҳи май нашр шуда, ахиран ба расонаҳо роҳ ёфт. Вакили порлумон пешниҳод кардааст, ки ба қонун дар бораи ҳифзи ҳуқуқи кӯдак тағйирот ворид шуда, дастрасии наврасони то 14-сола ба шабакаҳои иҷтимоӣ манъ шавад. Мақомоти Тоҷикистон ба ин пешниҳод ягон вокуниш накардаанд.

Баъзе коршиносони тоҷик мегӯянд, пурра маҳрум кардани наврасон аз истифодаи шабакаҳои иҷтимоӣ роҳи ҳал нест.

Таҷрибаи манъ кардани истифода аз шабакаҳои иҷтимоӣ барои наврасон дар баъзе кишварҳо ҷорӣ шудааст. Аз ҷумла мақомоти Австралия наврасони аз 16-сола поёнро аз дастрасӣ ба шабакаҳои иҷтимоӣ маҳрум мекунанд. Ин қонун аз моҳи декабри имсол ба иҷро медарояд.

Рӯзи 28-уми сентябр дар Молдова интихоботи порлумонӣ баргузор мешавад. Нуқтаҳои овоздиҳӣ соати 7 боз шуданд ва қарор аст раъйдиҳандагон то соати 21 мавқеи худро маълум кунанд.

Ин интихобот барои Молдова сарнавиштсоз гуфта мешавад, чун маълум мекунад, ки роҳи ин кишвар барои узвият дар Иттиҳоди Аврупо идома мекунад ё Молдова ба Русия наздик мешавад.

Дар интихоботи порлумонии Молдова 14 ҳизб ва чор номзади мустақил иштирок доранд. Рақобати асосӣ миёни ҳизби ҳокими "Амал ва ҳамбастагӣ" ва аҳзоби рӯ ба Маскав, аз ҷумла ҳизбҳои сотсиалистӣ ва комунистӣ мегузарад.

Мая Санду, раиси ҷумҳури феълии Молдова субҳи барвақт раъй дод ва аз шаҳрвандон хост, ки дар интихобот фаъолона ширкат карда, аз демократияи кишвар муҳофизат кунанд. "Молдова, хонаи ҳамаи мо дар хатар қарор дорад, имрӯз ҳамаи шумо муҳим ҳастед. Шумо метавонед бо раъйи худ кишварро наҷот диҳед", - гуфт Санду.

Ҳизби "Амал ва ҳамбастагӣ", ки роҳбараш Майя Санду аст, аз соли 2021 аксарияти курсиҳои порлумонро дар ихтиёр дорад. Аммо назарпурсиҳо нишон медиҳанд, ки ин ҳизб мумкин мавқеи худро аз даст диҳад.

Санду дар остонаи интихобот аз мардуми кишвараш хост, ба тарафдорӣ аз неруҳои рӯ ба Аврупо овоз диҳанд, чун Русия маблағи зиёде сарф кардааст то Молдоваро ба сӯи худ кашад. Раиси ҷумҳури Молдова мегӯяд, Русия "миллионҳо доллар сарф карда" талош дорад, ки овози интихобкунандагонро бихарад. Маскав дахолат дар умури дохилии кишварҳои дигарро рад мекунад.

Ҳукумати Тоҷикистон дастур додааст, ки хоҷагиҳои деҳқонӣ садҳо гектар заминро ба ҷангал баргардонанд. Ин заминҳоро солҳо қабл барои ташкили хоҷагиҳои деҳқонӣ ба мардум дода буданд.

Тоҳир Амиршоҳзода, раиси Муассисаи ҷангали минтақаи Кӯлоб моҳи август дар нишасти хабарӣ гуфт, баргардони заминҳо бо дастури раиси ҷумҳур ва додситонии кул анҷом мешавад.

Ба гуфтаи мақомот, барои ташкили хоҷагии деҳқонӣ дар ҳудуди ҷангал қарори ҳукумати ҷумҳурӣ лозим аст. Ҷангалбонҳо мегӯянд, танҳо он хоҷагиҳое дар заминҳои ҷангал кишту корро давом медиҳанд, ки қарори ҳукуматро дар даст доранд.

"Тибқи қонун ҳамон хоҷагиҳои деҳқониеро эътироф мекунем, ки Ҳукумати Ҷумҳурии Тоҷикистон ба онҳо қарор додааст. Агар қарор надошта бошад, он замин дар ихтиёри идораи ҷангал аст", - гуфт Тоҳир Амиршоҳзода.

Видеоро инҷо бинед:

Embed ба дигарон фиристед

Ҳукумати Тоҷикистон мехоҳад назорати ҷангалҳоро бозпас гирад

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:02:06 0:00

Ҷангалбонҳои минтақаи Кӯлоб дар ихтиёрашон 324 ҳазор гектар замин доранд. Аз ин миқдор 38 ҳазору 66 гектараш ба сокинон мувақатан дода шудааст. Маълум нест, ки чӣ қадар аз заминҳо бояд ба идораи ҷангал баргардонда шавад. То ин вақт додситонии кул қарори 16 хоҷагии деҳқониро бекор ва заминҳоро ба ҷангал баргардонидааст.

Тибқи омори пешниҳодкардаи Раиси Муассисаи ҷангали минтақаи Кӯлоб, дар ноҳияҳои Ховалинг, Шамсиддин Шоҳин, Балҷувон, Фархор 3610 гектар заминро дубора ба ихтиёри худ гирифтанд.

Соли 2022 ҳукумат барои васеъ кардани ҷангал барномаи махсус қабул кард. Бар пояи ин барнома, то соли 2040 бояд дар ҷангалҳои Тоҷикистон 2 миллиард дарахт шинонида шавад. Аз ин 860 миллион дарахт ба вилояти Хатлон рост меояд. Мувофиқи ин барнома, ҳамчунин то 30 дарсад чарогоҳҳо дар ҷангал кам карда мешаванд.

Дувоздаҳ кишвар, аз ҷумла Бритониё, Фаронса, Ҷопон, Арабистонӣ Саудӣ ва Испания барои ҳимояти молӣ аз ташкилоти худгардони Фаластин эътилоф ташкил кардаанд.

Вазорати корҳои хориҷии Испания дар баёнияе гуфт, эътилоф баъд аз он ташкил шуд, ки ташкилоти худгардони Фаластин "ба буҳрони молии бесобиқа" рубарӯ аст.

Намояндагони Ташкилоти худгардони Фаластин ахиран аз камбуди шадиди пули нақд хабар доданд.

Эътилофи нав бо ҳадафи таъмини молии Ташкилоти худгардони Фаластин воқеъ дар Ромаллоҳ, ҳифзи тавоноии он барои ҳукуматдорӣ, ирсоли хизматрасониҳои зарурӣ ва ҳифзи амният шакл гирифтааст. Намояндагони 12 кишвар гуфтаанд, ҳамаи ин талошҳо "барои суботи минтақа ва ҳифзи роҳи ҳалли ду кишвар зарурӣ ҳастанд".

Дафтари нахуствазири Фаластин эълом кардааст, ки 12 кишвар ваъда додаанд, ки барои ташкилоти худгардон ҳадди ақал 170 миллион доллар кумак мекунанд.

Вазири корҳои хориҷии Арабистон рӯзи 25-уми сентябр эълом кард, ки кишвараш ба ташкилоти худгардони Фаластин 90 миллион доллар медиҳад.

Бар асоси санаде ки соли 1994 дар шаҳри Париж тасвиб шуд, Исроил даромадҳо аз молиёт (андоз)-ро ба намояндагӣ аз ташкилоти худгардони Фаластин ҷамъоварӣ мекунад.

Пас аз оғози ҷанг дар Ғазза, Исроил ирсоли ин даромадҳоро ба Ташкилоти худгардони Фаластин манъ кард. Ташкилоти худгардони Фаластин мегӯяд, ки баъди ин кор хизматрасонӣ дар бахшҳои омӯзишӣ, табобат ба мушкил рубарӯ шуда, сатҳи фақр чанд баробар зиёд шудааст.

Исроил мегӯяд, ки бахше аз ин маблағро барои пардохти пули барқе, ки фаластиниҳо истифода бурдаанд, нигоҳ доштааст.

Додгоҳе дар Сурия ҳукми боздошти Башор Асад, раиси ҷумҳури сарнагуншудаи ин кишварро содир кард.

Ба гуфтаи додрас, Асад ба куштори барқасдона ва шиканҷа, ки боиси марг шудааст, муттаҳам мешавад.

Қарори додгоҳ ба мақомоти Сурия иҷозат медиҳад, ки барои боздошти Асад ба пулиси байнулмилалии Интерпол муроҷиат кунанд.

Башор Асад моҳи декабри соли 2024 дар пайи ошӯби гуруҳҳои мухолифаш сарнагун шуд ва ба Русия гурехт.

Ба гузориши хабаргузории давлатии Сурия SANA, Асад ба он муттаҳам мешавад, ки соли 2011 эътирози мардумро дар шаҳри Даръо бераҳмона саркӯб кардааст.

Ҳомиёни ҳуқуқ қарори боздошти Башор Асадро қадами муҳим барои барқарории адолат ва муҷозоти шахсоне хонданд, ки ба нақзи ҳуқуқи инсон муттаҳам мешаванд.

Бар асари садамаи нақлиётӣ бо иштироки як корманди додситонии Мӯъминобод дар шоми 25 сентябр, як сокини ҳамин ноҳия ҷароҳатҳои сахт бардошта, дар бахши эҳё бистарӣ шудааст.

Ду манбаи ҷудогона аз мақомоти интизомии вилояти Хатлон бе зикри номашон ҳодисаро тасдиқ карданд. Ба гуфтаи манбаъҳои Радиои Озодӣ, яке аз ёварони додситони ноҳия ҳангоми ҳаракат ба самти бинои додситонӣ, Раҳмоналӣ Раҷабовро, ки мотосиклсавор будааст, пахш мекунад.

"Ин одам дар роҳи худаш омада истода будааст, ин корманди прокуратура бо мошинаш тез меояд, дар ҳамон гардиши назди прокуратура ӯро мезанад. Баъди ҳодиса ӯро бемористон бурданд ва ҳоло дар шӯъбаи эҳё бистарист. Даст, по ва бинияш шикастааст. Дирӯз боз ба Кӯлоб бурда, томография карданд ва оварда бистарӣ намуданд",-афзуд манбаи Радиои Озодӣ

Аммо ин манбаъҳо дақиқ нагуфтанд, ки нисбати ин корманди додситонии ноҳия парванда боз шудааст ё на. Танҳо гуфтанд, ки нигоҳубин ва табобати ин нафар зери назари шахси додситони ноҳия қарор дорад.

Раҳмоналӣ Раҷабови 54-сола, сокини деҳаи Душанбечаи ноҳияи Мӯъминобод, ба ҳайси барқчӣ дар корхонаи парандапарварии ҳамин ноҳия кор мекардааст.

Мақомот то кунун дар мавриди ин ҳодиса ба таври расмӣ ибрози назар накардаанд. Назари кормандони додситонӣ, ки манбаъҳо мегӯянд, ҳодиса бо иштироки ӯ сурат гирифтааст, маълум нест.

Ин бори аввал нест, ки дар Тоҷикистон бо иштироки кормандони мақомот садамаҳои нақлиётӣ рух медиҳад.

Ду рӯз пеш аз ин, дар садамае бо иштироки як корманди Комиссариати ҳарбии ноҳияи Восеъ, се нафар кушта ва чор тан захмӣ шуда буд. Ҳодиса дар роҳи деҳаи Кадучии ҷамоати Бобошоҳиён рух дода буд.

Вазорати корҳои дохилии Тоҷикистон садамаро тасдиқ кард, вале ба корманди комиссариати ҳарбӣ будан ё набудани соҳиби мошин ишорае накард.

Дар Тоҷикистон аз тарзи таҳқиқи парвандаҳои ҷиноӣ, ки дар онҳо гумонбарон ваё содиркунандагони ҷиноят кормандони ҳифзи қонун мебошанд, зиёд интиқод мешавад.

Мунаққидон мегӯянд, ки кормандони ҳифзи қонун ваё додгоҳҳо талош мекунанд ҳамкорону ҳамтоёнашонро ба ҷавобгарӣ накашанд ва бо истифода аз имкониятҳо дар қонун, роҳҳои сабуккунандаи ҷазо барои ҳамтоёнашонро татбиқ мекунанд.

Мақомҳои амниятии Покистон гуфтаанд, ки дар ноҳияи Караки вилояти Хайбар-Пахтунгоҳ ба як маркази Таҳрики Толибони Покистон (ТТП) ҳамла карда, 17 ҷангҷӯйро куштаанд.

Шаҳбоз Илоҳӣ, аз масъулони пулис дар Карак гуфтааст, ки ин амалиёт рӯзи 26 сентябр анҷом шуд ва афзуд, ки дар ин даргирӣ се афсари пулис низ захмӣ шудаанд.

Ӯ ҷузъиёте бештаре ироа накард, аммо афроди кушташударо "хавориҷ" хонд. Истилоҳе, ки мақомоти покистонӣ ба Толибони он кишвар ба кор мебаранд.

Ду рӯз пеш аз ин ҳодиса низ нерӯҳои амниятии Покистон дар ноҳияи Дера Исмоилхон ба як маркази ҷангҷӯён ҳамла кардаанд, ки ба гуфтаи мақомҳо, дар натиҷаи он 13 ҷангҷӯи Таҳрики Толибони Покистон дар даргирӣ кушта шуданд.

Таҳрики Толибони Покистон ё ТТП то кунун дар мавриди ин гуфтаҳои мақомоти амнияти Покистон изҳори назар накардаанд.

Вазири корҳои хориҷии Тоҷикистон Сироҷиддин Муҳриддин рӯзи 25 сентябр дар ҳошияи иҷлоси Маҷмаи умумии СММ, бо муовини вазири корҳои хориҷии Амрико Кристофер Ландау мулоқот кардааст.

Вазорати корҳои хориҷии Тоҷикистон дар хабарномае навишт, ки ҷонибҳо дар ҷараёни ин мулоқот густариши ҳамкориҳои дуҷонибаи сиёсӣ, иқтисодӣ, тиҷоратӣ ва амниятиро мавриди баррасӣ қарор доданд.

Ба иттилои Сафорати Амрико дар Душанбе, Кристофер Ландау аз алоқамандии кишвараш ба сармоягузорӣ дар бахши маъданҳои муҳими Тоҷикистон, хабар додааст.

Манбаъ мегӯяд, ҷониби Амрико ҳамчунин аз таҷрибаи Тоҷикистон дар мубориза бо "Шохаи Хуросон"-и гурӯҳи "Давлати исломӣ", қадрдорӣ кардааст.

Чолишҳои амниятӣ ва таҳкими ҳамкориҳои минтақавӣ, аз дигар масоили мавриди гуфтугӯи ин ду дипломати баландояи тоҷик ва амрикоӣ будаанд.

Амрико солҳои зиёд аст, ки ба Тоҷикистон барои тақвияти амният дар марзҳояш ва кумак дар мубориза бо терроризм мадад мекунад.

Шӯрои Амнияти СММ рӯзи 26 сентябр қатъномаи пешниҳодии Русия ва Чин дар барои шаш моҳ ба таъхир андохтани таҳримҳои байналмилалӣ бар Эронро бо 9 раъйи мухолиф рад кард. Дар раъйгирӣ чаҳор кишвар аз ин қатънома тарафдорӣ ва ду кишвар аз раъй додан худдорӣ карданд.

Қабл аз раъйгирӣ, муовини намояндаи доимии Русия дар СММ, гуфт, ки "Эрон ҳар ончиро лозим буд, барои ҳамроҳӣ бо аврупоиҳо ва амрикоҳо анҷом дод, аммо қудратҳои ғарбӣ ҳеч созише накарданд".

Масъуди Пизишкиён, раисҷумҳури Эрон, рӯзи 26 сентябр гуфт, ҳатто агар таҳримҳои СММ дубора эҳё шаванд, Эрон аз Аҳдномаи манъи густариши силоҳҳои ҳастаӣ хориҷ нахоҳад шуд.

Пизишкиён дар ҳошияи Маҷмаи умумии СММ ба хабарнигорон гуфт, Эрон нияти баромадан аз Аҳдномаи манъи густариши силоҳҳои ҳастаиро надорад ва ҳушдор дод, ки қудратҳои хориҷӣ ба дунболи "баҳонаи сатҳӣ барои ба оташ кашидани минтақа" ҳастанд.

Доналд Трамп, раисҷумҳури Амрико мегӯяд, гуфтугӯ бо бозигарони минтақавӣ дар Ховари Миёна дар мавриди Ғазза, созанда будааст.

Ба гузориши хабаргузории "Рейтерз", Доналд Трамп рӯзи 26-уми сентябр гуфт, ки Исроил ва "Ҳамос" аз ин гуфтугӯҳо огоҳ ҳастанд ва ин музокрот то замоне, ки лозим бошад, барои даст ёфтан ба созиш, идома хоҳад ёфт.

Аммо дар мавриди бозигарони минтақа то ҳанӯз ҷузъиёти бештар ироа нашудааст.

Доналд Трамп ҳамчунин рӯзи ҷумъа баъд аз ин интиқодҳои сахти нахуствазири Исроил аз ба расмият шинохтани кишвари Фаластин аз сӯи шуморе аз кишварҳои ғарбӣ, эълон кард, ки ба созише барои поёни ҷанг дар Ғазза ва бозгардонидани гаравгонҳо, наздик шудааст.

Раисҷумҳури Амрико ба хабарнигорон гуфт, "ба назар мерасад, мо ба созише дар бораи Ғазза расидаем. Фикр мекунам, ин созиш гаравгонҳоро бозмегардонад ва ҷангро поён медиҳад".

Ин изҳорот дар ҳоле баён шуд, ки раҳбарони байналмилалӣ ин ҳафта дар СММ дар Ню-Йорк гирдиҳам омаданд ва Амрико як тарҳи 21-моддаии сулҳи Ховари Миёнаро бо ҳадафи поён додан ба ҷанги наздик ба дусола миёни Исроил ва "Ҳамос" дар Ғазза ироа кардааст.

Ҷанг навбатӣ миёни Исроил ва фаластиниҳо рӯзи 7 октябри соли 2023 бо ҳамлаи гурӯҳи "Ҳамос" оғоз шуд. Дар ин ҳамлаи "Ҳамос" 1200 исроилӣ кушта, беш аз 250 тани дигар ба гарав гирифта шуд.

Дар ҳамлаҳои наздик ба ду соли Исроил ба Ғазза, то кунун беш аз 65 ҳазор фаластинӣ нафар кушта, даҳҳо ҳазор тани дигар захмӣ шудаанд. Аксари қурбониёни ин ҳамлаҳо занон ва кӯдакон ҳастанд.

Паҳлавони тоҷик Обид Ҷебов дар мусобиқоти байналмилалии ҷудо Qingdao Grand Prix 2025, ки 26-уми сентябр дар шаҳри Тсиндаои Чин оғоз ёфт, медали нуқра ба даст овард.

Обид Ҷебов, ки дар вазни то 66 кило дар даври аввал озод буд, дар даври дуюм бар Нурмуҳаммад Ботабой аз Қазоқистон пирӯз шуда, ба нимфинал роҳ ёфт. Ҷебов дар даври ниманиҳоӣ Чаннйонг Кимро аз Кореяи Ҷанубӣ шикаст дода, ба финал баромад. Аммо паҳлавони 27-солаи тоҷик дар даври ниҳоӣ аз гуштигири 31-солаи муғул Басхуу Йондонперенлеи мағлуб шуд.

Дарвоқеъ, бори сеюм аст, ки Ҷебов аз ин рақиби пуртаҷрибаи худ шикаст мехӯрад. Медали нуқраи Обид Ҷебов аввалин ҷоизаи Тоҷикистон дар Qingdao Grand Prix 2025 аст.

Дар рӯзи аввали мусобиқот дар Тсиндаои Чин боз се нафар аз Тоҷикистон рақобат карданд. Муҳаммадсолеҳ Қувватов дар вазни то 60 кило, ки бар асоси қуръакашӣ дар даври аввал озод буд, дар даври дуюм бар Ҳйесунг Ҳванг аз Кореяи Ҷанубӣ пирӯз шуд. Аммо Қувватов дар ҳаштякфинал аз Ҳайато Кондои ҷопонӣ шикаст хӯрд. Паҳлавони 23-солаи тоҷик дар даври тасаллобахш аз рақиби ҳамсолаш Таики Накамураи ҷопонӣ мағлуб шуда, дар натиҷа мақоми ҳафтумро соҳиб гашт.

Меҳрзод Суфиеви 25-сола дар вазни то 60 кило аз даври дуюм вориди сабқат шуда, қувваозмоиро ба Туменҷаргал Тувшинтури 21-сола аз Муғулистон бохт ва аз ҳаққи идомаи мубориза маҳрум шуд.

Александра Кани 19-сола дар сабқати занон дар вазни то 57 кило дар даври аввал аз Яқи Гонги 20-сола аз Чин ноком шуда, аз идомаи мубориза бенасиб монд.

Ба иттилои Федератсияи байналмилалии ҷудо (IJF), дар Гран-прии Тсиндао 200 варзишгар (117 мард ва 83 зан) аз 26 кишвари 5 қора иштирок доранд.

Тоҷикистонро дар ин мусобиқот ҳафт гуштигир дар рақобатҳо байни мардон ва ду нафар миёни занон намояндагӣ мекунанд.

Дар ду рӯзи дигари мусобиқот панҷ нафар аз Тоҷикистон - Абубакр Шеров ва Масъуди Аҳмадзод, ҳарду дар вазни то 73 кило, Сомон Маҳмадбеков дар вазни то 81 кило ва Ҷаҳонгир Маҷидов дар вазни то 100 кило дар сабқати мардон, инчунин Виктория Киселёва дар вазни +78 кило дар сабқати занон - рақобат хоҳанд кард.

Абубакр Шеров, ки дар даври аввал озод аст, дар даври дуюм бо ғолиби ҷуфти Энхдул Лхамаа аз Муғулистон ва Эҷдер Токтай аз Туркия нерӯ месанҷад. Масъуди Аҳмадзод низ сабқатро аз даври дуюм шуруъ намуда, бо ғолиби ҷуфти Стевен Болдбаатар аз Иёлоти Муттаҳидаи Амрико ва Рамазон Коҷаков аз Баҳрайн қувваозмоӣ хоҳад кард.

Сомон Маҳмадбеков, ки дар даври аввал озод аст, дар даври дуюм бо намояндаи Чин Саилике Сонгҳайер ба рақобат мепардозад. Ҷаҳонгир Маҷидов дар даври аввал бо намояндаи Кореяи Ҷанубӣ Ҳансу Ким қувва меозмояд. Виктория Киселёва дар даври аввал бо Сун Шаоҳан аз Чин нерӯсанҷӣ хоҳад кард.

Барномаи мусобиқот:

26-уми сентябр (ҷумъа). Қувваозмоиҳо дар вазнҳои -48 кг, -52 кг, -57 кг миёни занон; -60 кг, -66 кг миёни мардон.

27-уми сентябр (шанбе). Қувваозмоиҳо дар вазнҳои -63 кг, -70 кг миёни занон; -73 кг, -81 кг миёни мардон.

28-уми сентябр (якшанбе). Қувваозмоиҳо дар вазнҳои -78 кг, +78 кг миёни занон; -90 кг, -100 кг, +100 кг миёни мардон.

Ба ҷуз аз медал, ғолибон дар ҳамаи 14 вазн (7 вазн байни мардон ва 7 вазн миёни занон) бо 3000 евро, барандагони медали нуқра бо 2000 евро ва соҳибони медали биринҷӣ бо 1000 евро мукофотонида мешаванд, ки 20 фисади маблағи ҷоизаҳои варзишгарон барои мураббиёнашон муқаррар шудааст.

Инчунин ширкаткунандагони ин мусобиқоти пурнуфузи байналмилалӣ соҳиби имтиёзҳо дар радабандии IJF (Федератсияи байналмилалии ҷудо) мегарданд.