Basha ndërpret seancën konstituive të Kuvendit të Kosovës në mungesë konsensusi për nënkryetarin serb

Sociologu dhe njohësi i çështjeve politike, Artan Muhaxhiri, i ka cilësuar si “maskaradë dhe parodi” zhvillimet në vazhdimin e seancës konstituive të Kuvendit të Kosovës, e cila u ndërpre pa u finalizuar plotësisht procesi.

Zgjedhjen e deputetit të Lëvizjes Vetëvendosje (LVV), Dimal Basha për kryetar të Kuvendit të Kosovës, ai e sheh si një përfundim të logjikshëm të nyjës së krijuar tash e disa muaj për zgjedhjen e kryeparlamentarit.

“Kjo maskaradë dhe parodi nuk ka pasur asnjë gjasë që të përfundojë me ndonjë personalitet nga eshaloni i parë i Lëvizjes Vetëvendosje. Prandaj edhe zoti Basha është zgjedhur si një kompromis dhe si një përfaqësues i lojës së Vetëvendosjes, e cila disi është dashur që të marrë fund. Dihet qartë që zoti Basha nuk i takon ‘radhës’ së parë të Lëvizjes Vetëvedosje”, vlerësoi Muhaxhiri për Radion Evropa e Lirë.

Ai shtoi se propozimi i Bashës ishte “lojë” e liderit të LVV-së, Albin Kurti, që sipas tij, t’i vendosë “para aktit të kryer partitë ish-opozitare (PDK-në, LDK-në dhe AAK-në)”, për shkak se bllokada në konstituimin e Kuvendit, në diskursin publik, filloi t’iu adresohet si faj edhe këtyre partive.

“Kështu, ato u detyruan ta japin një zotim publik se do ta votojnë çdo kandidat që nuk ka qenë në Qeverinë e kaluar, madje edhe Bashën, të cilin e kanë përqeshur. Kjo, për shkak se zotimi i tyre ishte dhënë blanko”, theksoi Muhaxhiri.

SHIKONI EDHE:

Kosova me kryetar të ri Kuvendi

Procesi i konstituimit është bllokuar për shkak të mungesës së konsensusit për ta zgjedhur nënkryetarin serb.

Lista Serbe, partia më e madhe e serbëve në Kosovë, e ka propozuar tri herë radhazi emrin e Sllavko Simiqit, mirëpo ai nuk i ka marrë 61 votat e nevojshme.

Muhaxhiri e sheh këtë situatë si ‘kurth’ të Lëvizjes Vetëvendosje, në të cilin ranë edhe partitë
tjera shqiptare, të cilat votuan për dy nënkryetarët e komuniteve joshumicë veç e veç.

Sipas tij, mosvotimi i dy nënkryetarëve të komuniteteve joshumicë në një pako, mund të kontestohet, sipas tij, si shkelje e praktikave të votimit në frymën kushtetuese në Kuvend.

“Besoj që kjo lëndë do të dërgohet në Gjykatën Kushtetuese, e cila sërish do të jetë vendimtare për normalizimin e skenës politike në Kosovë”, u shpreh Muhaxhiri.

Ai tha se mundësitë që Lista Serbe t'i sigurojë 10 nënshkrime të deputetëve për ta dërguar çështjen në Gjykatën Kushtetuese janë reale, dhe se kjo mund të ndodhë para kryerjes së afatit 30-ditor për konstituimin e Kuvendit, i cili përfundon më 18 shtator, sipas vendimit të Gjykatës Kushtetuese, të publikuar më 18 gusht.

Instituti Demokratik i Kosovës (KDI) ka dalë me një reagim publik në pasditen e së martës, duke shprehur shqetësim pse nuk është përmbyllur procesi i konstituimit të Kuvendit.

KDI-ja i ka theksuar edhe ato që i ka quajtur shkelje procedurale nga ana e kryetarit të Kuvendit, kur është ndarë procedura e votimit për dy nënkryetarët nga pakicat.

“Aktgjykimet e Gjykatës Kushtetuese kanë përcaktuar se konstituimi i Kuvendi duhet të bëhet edhe në bazë të praktikave të deritanishme sipas të cilave pesë nënkryetarët e Kuvendit janë votuar në dy pako të ndara. Fryma e Kushtetutës së Republikës së Kosovës (neni 67), Rregullores së Punës së Kuvendit (neni 12) dhe aktgjykimeve të Gjykatës Kushtetuese nënvizon thelbësisht nevojën për konsensus dhe gjithpërfshirje gjatë votimit të kryetarit/es dhe nënkryetarëve”, ka thënë KDI-ja në reagimin e vet.

Ky Institut u ka bërë thirrje subjekteve parlamentare që me përgjegjësi institucionale, dhe duke pasur prioritet interesin shtetëror, të përkushtohen për të gjetur një zgjidhje që përmbyll sa më parë procesin e konstituimit të Kuvendit, në përputhje me Kushtetutën dhe ligjet në fuqi.

Deputeti i Kuvendit të Kosovës, Armend Muja nga radhët e Lëvizjes Vetëvendosje e ka përshkruar si "gabim historik" mosvotimin e deputetit Nenad Rashiq si nënkryetar Kuvendi nga radhët e komunitetit serb.

Rashiqi është kryetar i partisë serbe për Liri, Drejtësi dhe Mbijetesë dhe ministër në Qeverinë në detyrë të Kosovës.

Kryetari i Kuvendit, Dimal Basha e ka ndërprerë seancën e Kuvendit në mungesë konsensusi për emrin e nënkryetarit serb.

Duke qenë se asnjëri prej kandidatëve të dalë nga shorti nuk i kanë siguruar votat e nevojshme, ai ka kërkuar ndaljen e punimeve, për t’u takuar sërish të enjten në orën 11:00.