Basha ndërpret seancën konstituive të Kuvendit të Kosovës në mungesë konsensusi për nënkryetarin serb

26 gusht 2025

• Deputeti i Lëvizjes Vetëvendosje, Dimal Basha, është zgjedhur kryetar i Kuvendit të Kosovës të martën, duke marrë 73 vota.

• Kuvendi zgjodhi edhe tre nënkryetarë nga partitë shqiptare: Albulena Haxhiun, Vlora Çitakun dhe Kujtim Shalën.

• Emilija Rexhepi u zgjodh nënkryetare nga pakicat joserbe, ndërsa konstituimi ngeci te votimi i kandidatit për nënkryetar nga pakica serbe.

• Konstituimi i Kuvendit do t'i hapte rrugë formimit të Qeverisë së re, pas një ngërçi të gjatë politik, pas zgjedhjeve të 9 shkurtit.

15:57 26.8.2025

Nenad Rashiq, propozimi i ri që nuk kalon

Kryetari i Partisë Serbe për Liri, Drejtësi dhe Mbijetesë, Nenad Rashiq ka qenë propozimi i radhës për nënkryetar Kuvendi.

Ai i ka siguruar vota 55 për, një kundër dhe 17 abstenime, duke mos u zgjedhur nënkryetar.

15:54 26.8.2025

Deputetja nga Lista Serbe e ka ndjekur rrugën e koleges së saj, Liljana Stefanoviq, duke refuzuar që të jetë kandidate për nënkryetare.

Ajo ka dështuar të marrë vota për në dy votimet që janë zhvilluar pak minuta më parë.

15:52 26.8.2025

Lilana Stefanoviq ka refuzuar të jetë kandidate për nënkryetare, kur emri i saj ka dalë nga shorti.

Kështu, emri i saj është eliminuar nga gara.

15:50 26.8.2025

As emri i dytë që ka dalë nga shorti, Stefan Kovaçeviq, nuk e ka siguruar asnjë votë për t'u zgjedhur nënkryetar.