Në sallën e Kuvendit erdhi Dimal Basha, por jo edhe deputetët e LVV-së
Në sallën e Kuvendit të Kosovës kanë ardhur pothuajse të gjithë deputetët, përveç atyre të Lëvizjes Vetëvendosje.
Seanca pritet të vazhdojë me votimin e nënkryetarëve të Kuvendit.
Deputetët fillojnë të hyjnë në sallë
Deputetët e LDK-së, PDK-së, si dhe ata nga radhët e komuniteteve, përfshirë edhe Listën Serbe, kanë filluar të hyjnë në sallën e Kuvendit për vazhdimin e seancës konstituive, ku pritet të zgjidhen pesë nënkryetarë të Kuvendit të Kosovës.
Limaj: Shpresoj se LVV do ta ketë një shpjegim para qytetarëve
Kryetari i Nismës Socialdemokrate, Fatmir Limaj, e ka kritikuar Lëvizjen Vetëvendosje se është vonuar në themelimin e institucioneve pas zgjedhjeve të 4 shkurtit, duke thënë se ajo duhet të shpjegohet para qytetarëve.
Limaj, i cili votoi kundër Dimal Bashën për kryetar të Kuvendit, tha pasi Basha u zgjodh: “Ishte votim pa marrëveshje politike, këtë kanë mundur ta bëjnë qysh në ditën e parë. Shpresoj se do ta kenë një shpjegim para qytetarëve të Kosovës”.
Lista Serbe: Basha nuk është figurë që mund të bashkojë deputetët
Lista Serbe shkroi në Facebook se ka votuar kundër Bashës, “për shkak të qëndrimit të tij antiserb, të cilin e përsëriti edhe në seancën e sotme të Kuvendit në Prishtinë, duke përdorur kualifikimet më të rënda ndaj popullit dhe shtetit serb”.
Në fjalimin që mbajti pas zgjedhjes si kryetar i parlamentit, Basha – sipas Listës Serbe – "tregoi se nuk është dikush që mund të bashkojë deputetët, pasi më shumë se gjysmën e fjalimit të tij ia kushtoi ofendimeve në adresë të popullit serb".
