Basha ndërpret seancën konstituive të Kuvendit të Kosovës në mungesë konsensusi për nënkryetarin serb

Edhe pse është paralajmëruar se në orën 12:30 do të vazhdojë konstituimi i Kuvendit, më saktësisht përzgjedhja e pesë nënkryetarëve, gazetarja e REL-it, Flaka Zogu, raporton se në sallën e Kuvendit aktualisht nuk është asnjë deputet.

Aty janë vetëm gazetarët dhe kameramanët. Në sallë ishin edhe ambasadori gjerman, Jorn Rohde, si dhe ambasadori britanik, Jonathan Hargreaves, por ata më pas u larguan nga salla. Ekipet e administratës së Kuvendit dhe sekretari janë në pritje për të vazhduar seanca.

Sipas Kushtetutës, tre nënkryetarët e propozuar nga tri grupet më të mëdha parlamentare (LVV, PDK, LDK) zgjidhen me shumicën e votave të të gjithë deputetëve të Kuvendit.

Dy nënkryetarë përfaqësojnë komunitetet që nuk janë shumicë në Kuvend dhe ata zgjidhen me shumicën e votave të të gjithë deputetëve.

Në të kaluarën, tre kandidatët e partive më të mëdha (shqiptare) janë votuar në një votim, ndërsa dy nga pakicat (një serb dhe një nga komunitetet tjera) janë votuar në një votim tjetër.

Kryetarja e Kuvendit të Shqipërisë, Elisa Spiropali, ia uroi Dimal Bashës zgjedhjen në krye të Kuvendit.

“Përgëzime Kuvendit të Kosovës për çeljen e rrugës për ndërtimin e institucioneve të reja demokratike pas zgjedhjeve.

"Mezi pres të rifillojmë bashkëpunimin e ngushtë vëllazëror mes Kuvendit të Shqipërisë dhe Kuvendit të Kosovës, për të mirën e qytetarëve tanë, për mbështetjen e integrimit euroatlantik të dy vendeve tona, dhe garantimin e mbrojtjen e të drejtave të shqiptarëve në rajon”, shkroi Spiropali në Facebook.

Në pritje të vazhdimit të seancës konstituive, e cila po vonon, ju njoftojmë edhe për reagime të tjera ndaj zgjedhjes së Dimal Bashës për kryeparlamentar.

Këshilltarja ligjore në Qendrën Evropiane për Liri të Shtypit dhe Medias, Flutura Kusari, tha se Dimal Basha është një ndër sulmuesit më të mëdhenj të gazetarëve dhe të aktivistëve në Kosovë.

“Uroj që marrja e pozitës së re do të ndikojë sadopak që Basha të përmbahet dhe të menaxhojë më mirë mosdurimin e tij dhe të partisë së tij ndaj pushtetit të katërt”, shkroi Kusari në Facebook.

Analisti Imer Mushkolaj tha se "për mirë a keq dhe me kosto politike, PDK e zhbllokoi situatën".

Ai kritikoi kreun e LDK-së, Lumir Abdixhikun, për deklaratën e tij se "ka fituar injoranca".

"Pse Lumir nuk dhe kontribut me e pengu këtë situatë, pse e lejove "fitoren e injorancës"? Si parti "institucionaliste", LDK e ka pasë mundësinë me vepru, por nuk ka dashtë. Tash kryetari po vajton. Dobët, shumë dobët".

Ambasada e Gjermanisë në Prishtinë e ka uruar Dimal Bashën për emërimin e tij në krye të organit ligjvënës të Kosovës.

Përmes një postimi në Facebook, ajo shkroi se “shpresojmë se Kosova tani do të jetë në gjendje t’i formojë institucionet.

Ndryshe, gazetarët e REL-it e panë sot në ndërtesën e Kuvendit ambasadorin gjerman, Jorn Rohde, si dhe ambasadorin britanik, Jonathan Hargreaves.