Kurti shpall fitoren

Presidentja e Kosovës, Vjosa Osmani, tha se pret që Komisioni Qendror Zgjedhor (KQZ) do ta përfundojë me sukses numërimin e votave brenda mbrëmjes së sotme, pas telasheve në ueb-faqen e komisionit.

“Pas dështimit të softuerit, informacion ky i konfirmuar nga KQZ-ja, Presidentja ka kërkuar që të mbrohet integriteti i procesit zgjedhor, duke siguruar që çdo votë të numërohet saktë”, tha Osmani, sipas një njoftimi nga Presidenca e Kosovës në Facebook.

“Presidentja do të vazhdojë të jetë në kontakt me të gjitha institucionet përkatëse, deri në sigurimin e plotë që i gjithë procesi zgjedhor, përfshirë numërimin dhe publikimin e rezultateve, të zhvillohet në përputhje me standardet më të larta demokratike dhe në përputhje me vullnetin qytetar”, thuhet në njoftim.

Pas telasheve të vazhdueshme pas fillimit të numërimit të votave rreth orës 20:00, faqja e KQZ-së u rikthye dhe sipas të dhënave të fundit, deri tani janë numëruar rreth 73 për qind të votave.

Kryetari i Listës Serbe, Zllatan Ellek, tha se kjo parti i ka fituar dhjetë nga dhjetë mandatet e garantuara për komunitetin serb në Kuvendin e Kosovës.

Ai tha se fushata ishte "e tmerrshme dhe brutale" kundër partisë së tij, por i falënderoi qytetarët për pjesëmarrjen, si dhe serbët e zhvendosur që erdhën nga Serbia për të votuar.

"Mirënjohje e madhe për Aleksandar Vuçiqin, ne kemi një shtet, një president. Ne nuk kemi shtet tjetër, e as që po e kërkojmë", tha Ellek në konferencën për gazetarë.

Pas konferencës, disa vetura me flamuj të Listës Serbe dhe të Serbisë qarkulluan nëpër rrugët e Mitrovicës së Veriut, duke u rënë borive.

Zëdhënësi i fushatës së Partisë Demokratike të Kosovës, Blerand Stavileci, është shprehur i lumtur me rezultatin e partisë së tij në zgjedhjet e 9 shkurtit, duke thënë se Partia Demokratike e Kosovës “ka arritur një rezultat të madh”.

PDK-ja ka fituar 22.68 për qind të votave pas numërimit të rreth 73 për qind të votave, sipas Komisionit Qendror Zgjedhor.

“Partia Demokratike e Kosovës është konfirmuar si forca e dytë më e madhe politike në vend, me mbi 200 mijë vota. Ky është rezultati më i mirë i PDK-së në shumë vite dhe një dëshmi e qartë e besimit të qytetarëve në vizionin tonë për Kosovën”, tha Stavileci.

Duke folur në një konferencë për media, ai shtoi se “ajo çfarë pamë në këtë proces është e qartë: shumica e qytetarëve ia kanë kthyer shpinën kësaj qeverie. Ata kërkojnë qeveri të re, qeveri tjetër. Ne jemi të lumtur me këtë rezultat”.

Stavileci nuk tregoi nëse PDK-ja është e hapur për koalicion kur u pyet nga gazetarët, duke thënë se për këtë vendosin më vonë kryetari i partisë, Memli Krasniqi dhe i nominuari për kryeministër, Bedri Hamza.

Udhëheqësi i Lëvizjes Vetëvendosje, Albin Kurti, shpalli fitoren para simpatizantëve të mbledhur në një shesh të Prishtinës, në orët e para të 10 shkurtit.

“Ne do t’i vazhdojmë punët e mira që i kemi nisur në katërvjeçarin e kaluar dhe do të bëjmë shumë punë të tjera, në përputhje me zotimet tona, cep më cep Kosovës”, tha ai.

Rezultatet preliminare nga Komisioni Qendror i Zgjedhjeve e nxorën Vetëvendosjen në vend të parë me 41.99 për qind të votave.

“Ajo që dihet nga rezultatet preliminare është se, edhe sikur të bëhen bashkë PDK-ja dhe LDK-ja, ato nuk bëhen sa Vetëvendosja”, tha Kurti.

Sipas tij, procesi zgjedhor ishte “ai i zgjedhjeve të lira dhe të ndershme, ishte demokratik dhe pa incidente”.

“Kështu ndodh kur është Qeveria jonë në pushtet, kur ekzekutivi jemi ne”, tha kryeministri i Kosovës, Kurti, dhe falënderoi autoritetet për angazhimin e tyre.