Arifi: Nga rezultatet jozyrtare, LVV do ta ketë vështirë
Politologu Dritëro Arifi thotë se rezultatet jozyrtare të zgjedhjeve tregojnë se Lëvizja Vetëvendosje mund ta ketë të vështirë formimin e Qeverisë e vetme.
Sipas tij, rezultatet jozyrtare janë një sinjal për partinë në pushtet, se duhet të punojë më shumë dhe të mos mbështetet vetëm në fjalë.
Rezultatet e exit-polleve kanë treguar se Vetëvendosje ka pësuar humbje të mbështetjes për rreth 10%.
Por, sipas Komisionit Qendror të Zgjedhjeve, me më shumë se 23% të votave të procesuara, Vetëvendsoje ka siguruar mbi 55% të votave.
Tetë persona të ndaluar për vepra penale kundër të drejtave të votimit
Prokuroria e Shtetit bëri të ditur se, ditën e zgjedhjeve, janë ndaluar 8 persona për vepra penale kundër të drejtave të votimit.
"Gjatë ditës së sotme, Prokurori i Shtetit ka pranuar disa informata dhe pas verifikimit të tyre deri në mbyllje të procesit të votimit, janë hapur katër raste kundër tetë personave, kurse informatat tjera janë duke u trajtuar", thuhet në njoftimin për mediat.
Policia e Kosovës tha më herët se procesi zgjedhor kaloi i qetë dhe pa incidente serioze.
Shtuni: Zgjedhje shembull
Politologu Adrian Shtuni thotë për Radion Evropa e Lirë se populli i Kosovës dhe institucionet e saj treguan standarde shembullore me organizimin e zgjedhjeve parlamentare të 9 shkurtit.
"Mbarëvajtja e procesit zgjedhor tregon për konsolidimin e demokracisë në Kosovë", thotë Shtuni dhe shton se këto zgjedhje duhet të merren si shembull edhe nga vendet e tjera të rajonit.
Në lidhje me pjesëmarrjen më të ulët në votime, krahasuar me zgjedhjet e vitit 2021, Shtuni thotë se ky "është një mesazh për politikanët në Kosovë" se "populli është i lodhur nga retorika agresive dhe përplasjet".
Shtuni: Marrëdhëniet me SHBA-në janë jetike
Politologu Adrian Shtuni thotë se deklaratat e kryeministrit të Kosovës, Albin Kurti, se marrëdhëniet me SHBA-në janë në nivelin më të mirë të mundshëm, janë një “shkëputje nga realiteti”.
Kushdo që ta formojë Qeverinë e Kosovës, sipas tij, do të duhet t’i trajtojë me seriozitet të jashtëzakonshëm këto marrëdhënie.
Ato janë jetike për Kosovën dhe popullin e saj, thotë Shtuni.
“Nëse vazhdohet me dredhi dhe premtime të pambajtura, kam përshtypjen se do të ketë probleme në këto marrëdhënie. Kushdo që ta bëjë Qeverinë e re, duhet të jetë i qartë për realitetin. Nëse nuk ka qartësi, do të ketë kosto të lartë”, thotë Shtuni për Radion Evropa e Lirë.
Sipas tij, angazhimi i administratës së presidentit amerikan, Donald Trump, në Kosovë do të varet edhe nga mënyra se si do të sillet Qeveria e Kosovës.
"Unë shpresoj të ketë më shumë angazhim nga SHBA-ja për të arritur një formulë për normalizimin e marrëdhënieve të Kosovës me Serbinë, por, siç e thashë, kjo varet edhe nga impenjimi i Qeverisë së Kosovës", thekson Shtuni.
