14:08
9.2.2025
Çfarë dimë deri më tani?
- Kutitë e votimit janë hapur në orën 7:00. Deri në orën 11:00 kanë dalë 8.58 për qind e qytetarëve për të shfrytëzuar të drejtën e votës.
- Komisioni Qendror i Zgjedhjeve ka thënë se procesi është duke u zhvilluar qetë dhe nuk është raportuar për ndonjë incident të madh.
- Ka pasur raportime për vonesa në hapjen e disa vendvotimeve dhe shqetësime për shënjimin e gishtërinjve me ngjyrë matrikuluese, por KQZ-ja nuk i ka adresuar këto çështje.
- Katër kandidatët për kryeministër – Albin Kurti, Bedri Hamza, Lumir Abdixhiku dhe Ramush Haradinaj – e kanë shfrytëzuar të drejtën e votës dhe u kanë bërë thirrje të gjithë qytetarëve që të veprojnë njëjtë.
- Thirrje të ngjashme ka bërë edhe presidentja e shtetit, Vjosa Osmani.
- Në këto zgjedhje po marrin pjesë edhe serbët lokalë, ndonëse kishin bojkotuar zgjedhjet prej nëntorit të vitit 2022, kur Lista Serbe – partia kryesore e serbëve në Kosovë – pati dhënë dorëheqje nga institucionet e Kosovës. Një pjesë e serbëve që financohen nga shteti i Serbisë, kanë votuar kolektivisht në një qendër votimi në Mitrovicë të Veriut.
- Zgjedhjet janë duke u mbikëqyrur nga rrjeti i organizatave joqeveritare, Demokracia në Veprim (DnV) dhe vëzhgues të angazhuar nga misioni i Bashkimit Evropian në Kosovë.
14:19
9.2.2025
📽 Pritjet e qytetarëve nga zgjedhjet
Disa nga qytetarët që votuan në orët e para të vendvotimeve, treguan për Radion Evropa e Lirë se çfarë presin nga këto zgjedhje.
Për më shumë, mund ta shikoni videon më poshtë:
14:59
9.2.2025
Të dashur lexues,
Lidhur me zgjedhjet parlamentare në Kosovë, informacionet e fundit tani do t’jua sjell Valona Tela.
Unë Mimoza Sadiku ju falënderoj për besimin!
Ju uroj një pasdite të mirë!
15:10
9.2.2025
Përshëndetje për të gjithë nga unë Valona Tela.
Komisioni Qendror i Zgjedhjeve njofton përmes ueb-faqes së tij se pjesëmarrja në zgjedhje, deri më tash, ka arritur në 17.36 për qind.
Sidoqoftë, KQZ-ja pritet të dalë në konferencë për media në 15:30 me të rejat e fundit.
Na ndiqni!