Trump shpërndan mesazhin e shefit të NATO-s që e lavdëron për vendimmarrjen rreth Iranit
Presidenti amerikan, Donald Trump e ka shpërndarë një mesazh që ia ka nisur shefi i NATO-s, Mark Rutte, i cili e përgëzon për marrjen e “veprimeve të vendosura” në Iran.
“Urime dhe faleminderit për veprimet tuaja të vendosura në Iran, ajo ishte diçka e jashtëzakonshme dhe diçka që nuk ka guxuar ta bëjë askush. Na bën të gjithë neve më të sigurt”, është thënë në mesazh.
Megjithatë, aty nuk përmendet saktë se cilit veprim të presidentit është duke iu referuar Rutte.
Përgjatë fundjavës, Trump ka urdhëruar sulme në qendrat bërthamore iraniane dhe në 24 orët e fundit e ka shtyrë Izraelin dhe Iranin drejt një armëpushimi.
NATO-ja e ka konfirmuar se mesazhet janë të vërteta.
Në mesazh, Rutte e lavdëron Trumpin edhe që i ka shtyrë vendet e NATO-s të shpenzojnë më shumë në mbrojtje.
Presidenti Trump është duke udhëtuar drejt Holandës për të marrë pjesë në samitin e aleancës veriatlantike, ku do të takohet me Rutten dhe liderë tjerë të 32 vendeve anëtare të NATO-s.
Ulet çmimi i naftës pas arritjes së armëpushimit Izrael-Iran
Çmimet e naftës janë ulur për gati 5 për qind të martën, pasi Izraeli është pajtuar për armëpushim me Iranin, për t’i dhënë fund konfliktit 12-ditor.
Çmimi i naftës së papërpunuar ka rënë fillimisht në 68 dollarë për fuçi, ndonëse ndërkohë është rritur për pak – 69.68 dollarë për fuçi - pasi Irani dhe Izraeli e kanë akuzuar njëri-tjetrin për shkelje të armëpushimit pak orë pas nisjes.
Çmimet e naftës janë rritur në ditët e fundit, pas shqetësimeve se Teherani do të mund t’i pengonte furnizimet globale duke mbyllur Ngushticën e Hormuzit, rrugë kryesore detare për transportin e naftës dhe gazit.
Kuptoni më shumë në linkun më poshtë:
India mirëpret armëpushimin
India e ka mirëpritur rolin e luajtur nga Shtetet e Bashkuara dhe Katari në arritjen e armëpushimit mes Iranit dhe Izraelit.
“Nuk ka alternativë ndaj dialogut dhe diplomacisë”, ka thënë Ministria e Jashtme e Indisë të martën, duke thënë se shpreson që të gjitha palët e prekura do të punojnë drejt paqes së qëndrueshme.
Kina shpreson në zbatim të armëpushimit
Kina ka thënë se nuk dëshiron të shohë “spirale të përshkallëzimit” në rajonin e Lindjes së Mesme, pas njoftimit të presidentit amerikan, Donald Trump për arritje të armëpushimit mes Iranit dhe Izraelit.
Ministria e Jashtme e Kinës ka thënë se shpreson që “armëpushimi mund të zbatohet sa më shpejt që është e mundur”.
Kina është partnerja më e madhe tregtare e Iranit dhe klientja e vetme për blerje të naftës.