Lexues të nderuar,
Këtu po e mbyllim mbulimin e drejtpërdrejtë të dëshmisë së gjeneralit amerikan në pension, Wesley Clark, pranë Dhomave të Specializuara në Hagë.
Në ditën e parë të dëshmisë së tij në mbrojtje të ish-presidentit të Kosovës, Hashim Thaçi, Clark, tha se nuk besonte që Thaçi ishte udhëheqës ushtarak i Ushtrisë Çlirimtare të Kosovës.
Clark, që udhëhoqi fushatën ajrore të NATO-s kundër caqeve ushtarake serbe në vitin 1999, tha se nuk besonte që Thaçi komandonte personat që kryen akte të dhunës pas çlirimit të Kosovës.
Ndërsa i pyetur nëse ka qenë e mundur që UÇK-ja të ketë pasur zinxhir komandues funksional me hierarki të plotë e NATO-ja dhe Shtetet e Bashkuara të mos e kenë ditur, Clark tha shkurtimisht: “Jo”.
Ai tha se nuk e di nëse Thaçi ka luftuar dhe nuk ishte në dijeni për Shtabin e Përgjithshëm të UÇK-së.
Clark tha se Thaçi nuk e dinte se ku gjendej ushtria serbe në mënyrë që NATO-ja ë shmangte shënjestrimin e civilëve gjatë bombardimeve.
Gjenerali amerikan në pension, që është dëshmitari i fundit i thirrur nga mbrojtja e Thaçit, do të vazhdojë dëshminë e tij para Dhomave të Specializuara të Kosovës në Hagë mëngjesin e së martës.
Faleminderit që na ndoqët!
Clark përfundon ditën e parë të dëshmisë në Hagë
Në pyetjen e fundit në ditën e parë të dëshmisë, Prokuroria e Specializuar e pyeti gjeneralin Clark për marrëveshjen tekniko-ushtarake dhe të demilitarizimit dhe nëse Millosheviqi do të mbante fjalën për to.
“Millosheviqi nëse do të detyrohej në mënyrë sipërfaqësonte do të respektonte premtimet. Por, unë nuk isha i kënaqur sepse kishte synime për të sabotuar misionin e NATO-s dhe mundësisht të rifitonte kontrollin në pjesën më të madhe të Kosovës”, tha ai.
Clark tha se nuk ka informacione të konfirmuara, por supozon që në dhjetor të vitit 1998, një delegacion rus në Beograd kishte biseduar me Serbinë për fushatën ajrore të NATO-së dhe "rusët në thelb iu kanë thënë mos u shqetëso se nuk kanë për ta bërë, shko spastrojë këta njerëz si të duash”.
Clark thotë se s’kishte dëgjuar për Shtabin e Përgjithshëm të UÇK-së
Në vazhdim të dëshmisë, Prokuroria e Specializuar e pyeti Clarkun nëse kishte dëgjuar për Shtabin e Përgjithshëm të UÇK-së dhe ai u përgjigj: “jo nuk kam dëgjuar”.
Ai u pyet nëse qëndron deklarata se ai nuk e di nëse Thaçi ka luftuar apo ka qenë vetëm udhëheqës politik, dhe Clark tha:
“Kjo është e saktë”.
Clark flet për “ekzagjerimet” për UÇK-në
Clark u pyet nga avokati i Jakup Krasniqit për deklaratat e bëra nga ai në kohën e luftës, kur kishte lavdëruar UÇK-në dhe kishte folur për kapacitetet e saj.
Clark e pranoi se ka ekzagjeruar kapacitetet e UÇK-së, duke thënë se “komentet kishin për shënjestër Millosheviqin dhe doja të projektoja këtë forcë dhe të nxitonte që ai të dorëzohej”.
Ai tha se e dinte që Millosheviqi e dëgjonte me vëmendje atë.
“Natën e bombardimeve të para, gjeneralët e tij i thanë se janë goditur nga avionë të shumtë të NATO-s. Më pas mu desh të mbaja një konferencë për shtyp dhe të thosha se kishin ndodhur disa humbje. Po i thosha qartë në mesazhin tim se ne po fitojmë dhe ju po humbisni”, tha ai.
Clark tha se situata e paraqitur prej tij ishte një situatë që e ngrite më lartë UÇK-në.
Ai përsëriti që UÇK-ja nuk ishte një organizatë e strukturuar, duke shtuar se ishte dëshira e tij që ajo të ishte një organizatë funksionale, por ky vlerësim “nuk mbështetej në kapacitetet e UÇK-së”.