Drejtpërdrejt Shtyhet seanca konstituive e Kuvendit pas kërkesës së Kurtit për kohë për një marrëveshje për presidentin

Deputetët e zgjedhur kanë filluar t'i zënë vendet e tyre në sallën e Kuvendit, në pritje të seancës konstituive.

Seanca duhej të niste në orën 10:00.

Kryetari i PDK-së, Bedri Hamza, tha se nuk kanë ndryshuar qëndrim sa i përket zgjedhjes së presidentit. Ai shtoi se në takimet e mëhershme nuk është diskutuar për mundësinë që PDK-ja të propozojë një kandidat për president.

“Qëndrimi i PDK-së është konsistent. Do të thotë, ne kemi shkuar në takim, nuk kemi garuar për ndonjë pozitë, kemi garuar dhe kemi kërkuar votën e qytetarëve të Kosovës për ekonominë, për drejtësinë, për energjinë, për infrastrukturën, për anëtarësimet... Nëse nuk kemi dakordim për këto tema, për këto prioritete, atëherë është absurde të flasim për tema të tjera.”

Partia Demokratike e Kosovës ka refuzuar ftesën e Lëvizjes Vetëvendosje për të diskutuar lidhur me zgjedhjen e presidentit.

Hamza nuk ka treguar nëse deputetët e kësaj partie do të votojnë për kryetarin e Kuvendit.

Lideri i Lidhjes Demokratike të Kosovës, Lumir Abdixhiku, ka thënë se çelësi i marrëveshjes mes partisë së tij dhe Lëvizjes Vetëvendosje të kryeministrit në detyrë, Albin Kurti, është pajtueshmëria për “balancë demokratike”.

Abdixhiku, i cili është takuar tri herë me Kurtin në përpjekje për të arritur një marrëveshje tejet të nevojshme për formimin e institucioneve dhe përfundimin e krizës politike, tha se mes palëve ka ende dallime të mëdha për çështjen e presidentit.

“Ka shumë afrime në shumë çështje, por ende kemi distancë në çështjen kryesore, që është balanca demokratike. Kuvendi duhet të konstituohet sot, nuk ka arsye për të mos u konstituuar”, tha Abdixhiku.

Abdixhiku tha se nuk dëshiron të flasë për emra individual për postin e presidentit, duke ngulur këmbë se partia e tij meriton postin.

“Ne kërkojmë balancë demokratike, e cila kërkon që LDK-ja të jetë e përfaqësuar. Nuk po flasim për emrat individësh, por për balanca demokratike që do të ishte e mirë edhe për Kosovën”, tha ai.

“Kemi edhe 25 ditë për formimin e Qeverisë. Nëse merremi vesh më herët për të gjitha institucionet, më mirë, nëse nuk merremi vesh, duhet të jemi transparent me ju dhe popullin se kaq kemi mundur dhe fatkeqësisht nuk mund të bëjmë më shumë. Përderisa po takohemi, është lajm i mirë”, shtoi ai.

Nënkryetari i LDK-së, Lutfi Haziri, tha duke hyrë në ndërtesën e Kuvendit se partia e tij është ende në fazën fillestare të bisedimeve me partinë në pushtet të kryeministrit në detyrë, Albin Kurti, për një marrëveshje politike.

“Jemi duke biseduar për ta ndërtuar një marrëveshje funksionale. Ende jemi duke biseduar mbi parimet. Lë të funksionalizohet Kuvendi në këtë fazë dhe LDK-ja do të vazhdojë të bisedojë me LVV-në”, tha Haziri.

Kurti dhe lideri i LDK-së, Lumir Abdixhiku, janë takuar disa herë deri tani, por nuk kanë arritur ndonjë marrëveshje për formimin e institucioneve të vendit.

Haziri nguli këmbë se dallimet mes palëve nuk janë të mëdha.

“Nuk ka çështje që në këtë fazë na dallojnë shumë. Sa i përket politikave sektoriale, agjendës, proceseve politike, nuk është biseduar shumë, nuk është biseduar në hollësi. Jemi në nivelin e diskutimit të parimeve bazë. Ndarja e përgjegjësive është krejt e fundit. Më rëndësi është të ketë vullnet të mirë”, shtoi Haziri.

Një ditë më herët, deputetë të zgjedhur të Lidhjes Demokratike të Kosovës kishin deklaruar se partia e tyre kërkon postin e presidentit.