اروپايي ټولنې د روسیې د ګازو په صادراتو یو لړ بندیزونه ولګول.
د اروپايي ټولنې د بهرنیو چارو وزیرانو ویلي چې په اوکراین کې د روسیې د جګړې په خاطر یې د بندیزونو نوې بسته تصویب کړې ده.
د اعلامیې له مخې د بندیزونو په دې نوې لړۍ کې د روسیې د طبیعي مایع ګازو وړونکې کښتۍ چې په اروپا کې چلېږي هدف ګرځول شوي.
اروپايي ټولنه اټکل کوي چې تېر کال د روسیې شاوخوا څلور تر شپږ میلیارد متر مکعبه طبیعي ګاز د اروپایی ټولنې د بندرونو له لارې درېیمو هېوادونو ته لېږدول شوي دي.
روسیه تورنه ده چې له بندیزونو د خلاصون لپاره "پټې بېړۍ" چلوي او د انرژۍ له عایداتو جګړه تمویلوي.
په نویو بندیزونو کې یوه ماده هم شامله ده چې سویډن او فنلنډ ته اجازه ورکوي چې له روسیې سره د مایع طبیعي ګاز ځینې قراردادونه لغوه کړي.
دا بسته په روسیه کې د ساختماني پروژو بشپړولو لپاره نوې پانګوونې او خدمات هم منع کوي.
د منځنۍ اروپا ځینې هېوادونه لا هم له روسیې څخه د اوکراین له لارې ګاز ترلاسه کوي.
اروپايي ټولنې په ۲۰۲۲م کال کې د روسیې د تېلو پر وارداتو بندیز ولګاوه چې له ځینو محدودو معافیتونو سره مخ شو.
وروسته له هغه چې روسیې د ۲۰۲۲م کال په فبرورۍ کې په اوکراین خپل غیرموجه یرغل پیل کړ، لوېدیځو قدرتونو د مسکو په وړاندې پراخ بندیزونه ولګول چې وروسته په تدریجي ډول زیات شوي دي.
د اروپايي ټولنې د بهرنیو چارو وزیرانو ویلي، د بندیزیونو په نوې لړۍ کې ۱۱۴ اشخاص او بنسټونه په نښه شوي چې د اوکراین د ارضي تمامیت، خپلواکۍ او ازادۍ ضد کړنې کوي.
په دې سره د ټولو هغو اشخاصو او ادارو شمېر ۲۲۰۰ ته رسېږي چې د اروپايي ټولنې له خوا پرې بندیزونه لګول شوي.
په ټولیز ډول ۶۱ نورې روسۍ ادارې چې اکثره شرکتونه، بانکونه، بنسټونه او سازمانونه پهکې شامل دي، د اروپايي ټولنې تر بندیزونو لاندې دي.
ډېری دا شرکتونه، چې ځینې یې په چین، ترکیې او متحده عربي اماراتو کې فعال دي، د اروپایي ټولنې د بندیزونو په مخنیوي یا روسیې ته د حساسو تجهیزاتو په چمتو کولو تورن دي.
همداراز په اروپايي ټولنه کې د روسیې د مرکزي بانک شاوخوا ۲۱۰ میلیارده یورو (۲۲۵ میلیارده ډالر) شتمنۍ هم کنګل شوې دي.
شاوخوا ۵۰ نور چارواکي د شتمنیو کنګل او د سفر بندیز سره مخ دي.
د روسیې ولسمشر ولادیمیر پوتین او د بهرنیو چارو وزیر سرګي لاوروف او همدا راز لسګونه د پارلمان غړي او یو شمیر اولیګارچان یا دولت پلوه با نفوذه خلک د هغو څه باندې ۱۷۰۰ کسانو په ډله کې دي چې لا دمخه د اروپايي ټولنې د بندیزونو په لېست کې راغلي.
