د افغانستان د عامې روغتیا وزارت وايي چې د پولیو واکسین د تطبیق مرکزونه په ټولو ولایتونو کې فعاله دي او له همدې امله د پولیو پېښې راکمې شوي دي.
د عامې روغتیا وزیر فیروز الدین فیروز د دوشنبې په ورځ په کابل کې د پولیو د له منځه وړلو د بېړني مرکز د بنسټ ډبرې د اېښودنې پر مهال وویل، هڅه کوي چې د روان میلادي کال تر پایه د پولیو ناروغې له منځه یوسي.
ښاغلي فیروز زیاته کړه:
"د افغانستان د دولت ژمنه دا ده چې د کال تر پایه د پولیو ناروغي ختمه شي.موږ سږ کال په افغانستان کې د پولیو د شپږو پېښو شاهدان و په تېرو کلونو کې زیاتې وې دا د دې ښکارندوي کوي چې د عامې روغتیا وزارت له خپلو نړیوالو همکارانو سره د پولیو په برخه کې د ښه کېدو پر لور روان دی."
ښاغلی فیروز وايي چې د ننګرهار د سرحدي سیمو په څېر په ځینو محدودو ځایونو کې اسلامي دولت نومې ډلې ته وفادار کسان روغتیايي خدماتو او د پولیو واکسین تطبیق ته اجازه نه ورکوي.
پولیو یا د ماشومانو ګوزڼ یو له شدیدو ناروغیو څخه ده چې له یوه انسان څخه بل ته د خولې له لارې انتقالېږي چې د ماشومانو د فلج یا ګوزڼ لامل کېږي او درملنه هم نه لري.
د عامې روغتیا وزارت وايي چې په روان میلادي کال کې د پولیو شپږ پېښې په افغانستان کې ثبت شوي او په وروستیو کې د پولیو پېښې یوازې په افغانستان او پاکستان کې لیدل شوي خو هڅه کېږي چې د دغه ناروغۍ د لمنځه وړلو لپاره له نړیوالو سره په همغږۍ جدي اقدامات وشي.
د عامې روغتیا وزارت په وینا له تېرو څو کلونو راهیسې د بیل او میلاندا ګیټس بنسټ په دې برخه کې له دوی سره همکاري کوي او اوس د پولیو د لمنځه وړلو لپاره د بېړنې مرکز د جوړېدو مالي لګښت ورکوي چې 2.4 میلیون ډالره کېږي.
د ګیټس بنسټ د پولیو د برخې سلاکار عصمت الله عرب وايي، له عامې روغتیا وزارت، نړیوال روغتیايي سازمان او یونیسف سره په همغږۍ هڅې روانې دي چې د روان میلادي کال تر پایه په افغانستان کې د پولیو ناروغي لمنځه یوړل شي.
ښاغلي عرب زیاته کړه:
"د ګېټس بنسټ د عامې روغتیا وزارت، نړېوال روغتیایي سازمان او یونېسف له طریقه هغه ټول امکانات چې مهم دي برابره وي یې څو د لوژستيکې خدماتي پرسونل او د عامه پوهايي په وسیله وکولای شو د پولیو پېښې کابو کړو."
ښاغلی عرب وایي، د ګېټس بنسټ ورته مرکزونه د افغانستان په لویو ښارونو کې جوړ کړي څو د دغه مرکزونو ترمنځ د منظمې همغږۍ له مخې وکړای شي د پولیو ناروغي کابو کړي.
په ورته وخت کې د عامې روغتیا وزارت وایي چې د ډیورنډ فرضي کرښې په ګډون یې په ټولو سرحدي سیمو کې روغتیایي مرکزونه فعال کړي او مسافرینو به د روغتیايي کارکونکو له خوا واکسین شي.
راپور: محمد حدیث پردېس
