د افغانستان د عامې روغتیا وزارت ډاکترانو او کار کارکوونکو د یوې غونډې په جوړولو سره، د واکسین نړیواله اوونۍ ولمانځله.
د دې وزارت د پالیسۍ مرستیال د دوشنبې په ورځ په کابل کې وویل، ماشومانو ته د پولیو د واکسین پلي کول او په ټولیز ډول خلکو ته د روغتیايي خدمتونو رسول، د دوی په لومړیتوبونو کې دي.
د افغانستان د عامې روغتیا وزارت د هېواد له ټولو کورنیو وغوښتل چې له پنځه کالو څخه د لږعمر ماشومان واکسین کړي څو، د مرګونې ناروغیو پر وړاندې وقایه شي.
د دغه وزارت مرستیال ډاکټر احمد جان نعیم د دوشنبې په ورځ د واکسین د نړیوالې اوونۍ په مناسبت په جوړې غونډه کې وویل، سره له دې چې د عامې روغتیا وزارت د خپلو روغتیا یي مرکزونو له لارې خلکو ته په وړیا توګه ۱۲ ډوله واکسین وړاندې کوي خو داسې کورنۍ شته چې ماشومانو ته د واکسین په پلي کولو کې بې پروايي کوي.
ښاغلي نعیم دا هم وویل، د واکسین د اوونۍ په ورځو کې باید د مرکز ټول ماشومان واکسین شي.
هغه زیاته کړه:
"د واکسین نړیواله اوونۍ هغه ابتکار دی چې د واکسین پر اهمیت پرې تاکید کېږی او همدارنګه واضح کېږي چې د دې خدماتو رسول د وزارت په لومړیتوبونو کې دي، سربېره پردې د واکسین د ګټو د بیانولو په خاطر د عامه پوهاوي پروګرام هم پیلېږي."
ښاغلي نعیم له دیني عالمانو او د جوماتونو له ملا امامانو و غوښتل چې د واکسین د ګټو په خاطر، خلکو ته تبلیغ وکړي.
د عامې روغتیا وزارت د معلوماتو له مخې په ټول هېواد کې د واکسین د پلې کولو لپاره، ۲۳۰۰ روغتیايي مرکزونه فعال او ۲۸۰۰۰ رضا کاران ورته ګمارل شوي دي.
د عامې روغتیا وزارت وايي، که څه هم د هېواد ځینې سیمې نا امنه دي خو د واکسین د پلي کولو مرکزونه په کې پرانیستل شوي دي.
دا په داسې حال کې ده چې په دې ورستیو ورځو کې د کونړ په ولایت کې ۳ او هلمند کې د پولیو یوه مثبته پېښه ثبت شوې ده.
د روغتیا د نړیوال سازمان استازی ډاکټرې ایمان وايي، د روغتیایي سیسټم پیاوړتیا او ماشومانو ته د واکسین پلي کول مهم دي.
دې وویل، د روغتیا نړیوال سازمان ژمن دی چې په دې برخه کې د عامې روغتیا له وزارت سره مرستې وکړي.
نوموړې یاته کړه:
"ډبلیو، ایچ، او، په افغانستان کې د واکسین په پلې کولو کې له عامې روغتیا له وزارت سره همکار دی، همدارنګه موږ یو ستراتیژی جوړه کړې هغه ماشومان چې واکسین شوي نه دي، واکسین شي."
د روغتیا د نړیوال سازمان د معلوماتو له مخې د مګړۍ په ټوله نړۍ کې ۲۲ میلیونه ماشومان د پولیو واکسین ته لاسرسی نه لري او په افغانستان یو پر پنځمه برخه ماشومان له واکسین څخه بې برې برخې دي.
راپور:خان محمد سیند