Күлкү кербени

Окуучуларга совет доорунун тарыхы боюнча маалымат берип жатып, мугалим алдыда отурган кыздан сурайт:

- Деги, 20-кылымдын тарыхын жакшылап окусаң керек? Кана, айтчы, "колхоз" деген сөздү түшүндүрө аласыңбы?

- Ооба, агай.

- Жакшы, кызым, айта гой анда.

- "Колхоз" деп айылдан, элеттен шаарга келген балдарды айтып коюшат, агай.

- Бул сөздүн башка да мааниси барбы?

- Маанилеши: кыргызча көчө тилде "мырк" деп да коюшат, казакча "мамбет" дешет экен.

Бир орто мектепте тынчтык сабагына Путиндин өзү катышып, саал узагыраак убакыт сүйлөйт экен. Айрым окуучулар уйкусурай баштаганын сезип, ал суроо менен окуучуларга кайрылат экен:

- Балдар, кимдир-бирөөңөрдө мага карата суроо барбы?

Тайманбас атка конгон Петя Иванов ордунан шарт турат да, суроосун узатат:

- Менин Сизге үч эле суроом бар: 1) Литвиненкону ким өлтүрдү? 2) Эмне үчүн өлкөбүздүн калкы өтө жакыр? 3) Эмне үчүн өлкөбүздө адам укуктары улам-улам бузулуп жатат?

Путин жарга такалгандай сезет, бирок капысынан коңгуроо кагылып, окуучулар танаписке чыгат.

Танапистен соң Путин кайра окуучуларга кайрылат:

- Мага суроо бергиси келгендер болсо, эч тартынбай мүмкүнчүлүгүңөрдөн пайдалангыла, балдар!

Ордунан турган Вовочка:

- Менин Сизге беш эле суроом бар: 1) Литвиненкону чын эле ким өлтүрдү эле? 2) Эмне үчүн өлкөбүздүн калкы итке минип калды? 3) Эмне үчүн өлкөбүздө адам укуктары тынымсыз бузулуп жатат? 4) Эмне үчүн танапис 20 мүнөткө эрте жарыяланып калды? 5) Досум Петяны каякка алып кетишти?