Күлкү кербени

* * * * * * *

Борбордук азиялык өлкөлөрдүн биринин “улут башчысы” мекендештерине көгүлтүр экрандан кайрылууда:

- Алтын баштуу кишилерибиз бүт Америкага кетип калды, колу алтындар Орусияда жүрөт. Эми силер менен кандай тирилик кылабыз, урматтуу алтын тиштүүлөр?!

* * * * * * *

Казакстанда жаңы конок үй курууну чечишти.

Дароо Түркиядан ишкер келди:

- Мага макул болсоңуздар, 3 миллион долларга баары бүтөт.

Финляндиядан бир курулуш компаниясынын кожоюну келди:

- Мага бул долбоорду берсеңиз. 6 миллионго бүтүрөм.

Министрдин таанышы келди:

- Мен 9 миллионго койкойтом.

- Кантип? Өтө эле чоң сурап атасың го?

- Анын 3 миллиону сага, 3 миллиону мага тийет?

- Анан?..

- Калганын түрк ишкерге беребиз. Ал жакшылап курсун да!

* * * * * * *

Айрым ата-энелер, чынында да, тарбиялык маанайда «элдин балдары (кыздары) минтишет экен, сен качан ошентесиӊ?» деп айтып калышат. Азыркы жаштар бул сыяктуу кептерге жылмая кайрылышып, мындайча варианттарды сунушташты:

ЭЛДИН БАЛДАРЫ…

* * * * * * *

Элдин балдары машинаны айдай турган күбөлүктү жөн эле сатып алышат экен, сен эминеге эле убакыт коротуп атасыӊ?

* * * * * * *

Элдин сендей балдары эмитен эле ата-энесин неберелүү кылышты, сен жүрөсүӊ дөлдүрөп эч кызга сөз айтпай.

* * * * * * *

Элдин балдары ОРТ тапшыруу үчүн китепканага чапкылап окуп жүрөт, сен эле камаарабай уюкфонду чукулап отурасыӊ.

* * * * * * *

Элдин балдары акчаны самандай таап келет экен, сен эмгиче жол киреге тыйын сурайсыӊ.

* * * * * * *

Элдин балдары эл аралык конкурстарда жүрөт, сен эле футбол көрүүдөн бошобой койдуӊ.

ЭЛДИН КЫЗДАРЫ...

* * * * * *

Элдин кыздары сендей маалында камыр жайып тандырга нан жапчу, а сен дүкөндөн нан сатып келгенден эринесиӊ.

* * * * * * *

Элдин кыздары кесме жасаганды эчак эле билип алыптыр, сен картөшкө да аарчый албайсыӊ.

* * * * * * *

Элдин кыздары тайманбай ырдап берет экен, сен жада калса «Кара жорго» бийлегиӊ келбейт!

* * * * * * *

Элдин кыздары кээде төркүлөп турат экен, сен эле бизге жолобой койдуӊ.

* * * * * * *

Элдин кыздары төркүнүнө анда-санда келет экен, сен эле күн алыс жетип келе каласыӊ.

* * * * * * *

Элдин кыздары ата-энесинин үйүн акилеп кетет экен, сен эле келип алып китептен башыӊ чыкпай отурасыӊ.

* * * * * * *