Борбордук шайлоо комиссиясы (БШК) Жогорку Кеңештин экс-депутаты Султанбай Айжигитовдун социалдык тармактарда жасаган билдирүүсүнө комментарий берди. Боршайком сотко чейинки териштирүүнү жүргүзүү мекеменин ыйгарым укугуна кирбей турганын, конституциялык мыйзам боюнча БШК шайлоолорду жана референдумдарды даярдап жана өткөрүүнү камсыз кылуучу орган экенин билдирди.
БШК Султанбай Айжигитов депутаттык мандатына байланыштуу маселеде мыйзамдарды бурмалап, коомчулукту адаштырып жатканын белгиледи.
Султанбай Айжигитов аны мандаттан ажыратуу тууралуу БШКнын чечимине байланыштуу сотко чейинки териштирүү жүргүзүү үчүн 8-апрелде Боршайкомго арыз берген. Ага жооп болбогондуктан 14-апрелде дагы бир арыз калтырган. БШК ага ошол эле күнү жооп берип, Боршайкомдун аны мандаттан ажыраткан чечимине каршы сотко кайрылса болорун билдирген. Султанбай Айжигитов сотко берерден мурун Административдик процессуалдык кодекс боюнча сотко чейинки териштирүү болушу керектигин айтып жатат.
БШК шайлоо боюнча конституциялык мыйзам кодекстен жогору экенин, ушундан улам мекеме сотко чейинки териштирүү жүргүзбөй турганын кошумчалады.
БШК 28-мартта Султанбай Айжигитовдун мандатын алган. Ал жыйында Улуттук коопсуздук боюнча мамлекеттик комитеттин (УКМК) бөлүм башчысы Жеңиш Сейитов Султанбай Айжигитовду 2021-жылы депутаттыкка талапкер кылып каттоодо “Президентти жана Жогорку Кеңештин депутаттарын шайлоо жөнүндө” мыйзам бузулганын айткан. Ал талапкер болуп катталуу үчүн Борбордук шайлоо комиссиясына кылмыш жоопкерчилигине тартылганы тууралуу маалыматты бербей, жашырып койгон деп билдирген.
Боршайкомдун төрагасы Тынчтык Шайназаров Чүйдүн Сокулук райондук соту 2020-жылдын 14-февралында Султанбай Айжигитовду денеге жеңил жаракат келтирүүгө байланыштуу күнөөлүү деп тапканын, Чүй облустук соту 2021-жылдын 10-июнунда райондук соттун өкүмүн күчүндө калтырганын, бирок өзү бул маалыматты жашырып койгонун айткан.
Султанбай Айжигитов соттуулугу жок экенин, анын мандаты саясий негизде алынганын билдирип, БШКнын чечимине каршы Бишкектин административдик сотуна арызданган. Бирок сотко чейинки териштирүү болушу керек деген жүйө менен арызын артка алган.
УКМКнын төрагасы Камчыбек Ташиев парламенттин 19-марттагы жыйынында Кыргызстан менен Тажикстандын чек ара келишимдери тууралуу маалымат берген. Ушул эле отурумда “Султанбай Айжигитов 2017-жылы бир баланы уруп кылмыш иши ачылганын, кийин мөөнөтү өттү деген негиз менен кылмыш жоопкерчилигинен качып кеткенин” айткан. Бул боюнча документтерди БШКга бергенин билдирип “эртең Султанбай Абдрашитовичтин мандатын алып койсо таң калбаңыздар” деген.
Султанбай Айжигитов “баланы сабаганы тууралуу далил жок экенин, ушунун негизинде “мөөнөтү өтүп кетти” деген жүйө менен сот бул ишти жапканын жана соттуулугу жок экенин” айткан.
Султанбай Айжигитов быйыл 5-мартта Жогорку Кеңештин жыйынында “Баткен районундагы Достук айылы Тажикстанга өтүп кетсе Ворух анклавына коридор ачыларын” билдирген. Жогорку Кеңештеги “Ыйман Нуру” фракциясы өз өкүлүнүн мындай билдирүүсүнөн кийин аны фракциядан чыгарган.
Президент Садыр Жапаров “Кабар” улуттук маалымат агенттигине маек берип, чек ара түбөлүккө чечилип жатканын жана эки тараптын кызыкчылыгы тең эске алынганын айткан жана Султанбай Айжигитовдун сөзүн четке каккан.
19-мартта Жогорку Кеңеште кыргыз-тажик чек арасына байланыштуу келишимдер ратификациядан өтүп, добуш берүүгө катышкан 85 депутаттын ичинен жалгыз Султанбай Айжигитов каршы добуш берген.
Садыр Жапаров 25-мартта Кыргызстан менен Тажикстандын чек арасы тууралуу келишимди ратификациялоо боюнча мыйзамга кол койгон. (BTo)
Шерине