Министрлер кабинетинин төрагасынын орун басары Эдил Байсалов Европа Биримдигин кыргызстандык студенттер үчүн виза берүү эрежелерин жеңилдетүүгө чакырды. Бул тууралуу Байсалов Францияга сапарынын алкагында Euronews телеканалына курган маегинде билдирди.
“Алар бул жакка келип, Европа борборлорунун даңазалуу маданияты менен таанышууну каалайт”, - деди Байсалов.
Ал Евробиримдик технологиялардын гана эмес, жаңы идеялардын да активдүү булагы болгондуктан Кыргызстан Еврошаркетти артыкчылыктуу өнөктөш катары көрө турганын белгиледи.
Өзбекстандын Самарканд шаарында 3-4-апрелде алгачкы ирет өткөн “Евробиримдик–Борбор Азия” саммитин Байсалов кызматташтыктын жаңы тарыхый этабы деп баалап, мындан аймакта жашаган ар бир тургун утушта болорун билдирди.
4-апрелде "Борбор Азия–Европа Биримдиги” саммитине Казакстандын, Кыргызстандын, Өзбекстандын, Тажикстандын, Түркмөнстандын лидерлери жана Еврокомиссиянын президенти Урсула фон дер Ляйен, Европа кеңешинин президенти Антониу Кошта катышты.
2024-жылы 25-июнда “Европа Биримдиги менен Кыргыз Республикасы ортосундагы кеңейтилген өнөктөштүк жана кызматташтык жөнүндө” келишимге кол коюлган. Бул документ 1999-жылкы Бишкектин жана жалпы Брюсселдин ортосундагы өнөктөштүк жана кызматташтык тууралуу келишимди алмаштырары айтылган.
Шерине